Jergilikti telearnalardyń birinde týrızm salasynyń bir qyzmetkeri: «Byltyrǵy jyldyń ózinde 700-ge jýyq Qytaı azamattary men azamatshalary elimizge qonaqqa keldi. Bul biz úshin úlken jetistik. Bolashaqta elimizge keletin qytaı ultynyń ókilderine álde de jaqsy jaǵdaı jasaý úshin barymyzdy salyp jatyrmyz» dep qýanyshy qoınyna syımaı suhbat berip tur eken. Árıne, bul aıtylǵan aqparat ta basqa jańalyqtar sekildi teledıdar ekranynan dem arada óte shyqty.
Degenmen... Júrek túkpirine túrli túıtkilderdi taratyp ketken edi.
Baıqap qarasaq, osy biz «Qazaq qonaqjaı halyq» degen saıyn keıde asyra siltep jiberetin sıaqtymyz. Kelgen qonaqty tóbemizge kóterip kútetinimiz – ata men anadan taraǵan qanymyzdyń erekshe qasıeti. Biraq sol atalarymyz ben analarymyz óz shańyraǵynda eshkimdi dandaısytyp júrgizip, shalqaıtyp jatqyzbaǵan. Tipti, bosaǵadan attaıtyn kezdiń ózinde, óz ornyn bilip, qurmet kórsetip, basyn ıip kirsin degen oımen joǵarǵy jaǵyn tómen etip jasaǵan. Dala fılosofıasynda ıgilikke jaraǵan ata-babamyzdyń osy ádisin qala fılosofıasyna engize almaı júrgenimiz ras.
Burynǵy kúnderi sál ǵana bolsa da ımene basyp júretin qytaı azamattary búgingi kúni kóshede kezigip qalsań, qaǵyp óte salatyn dárejege jetkeni – osynyń aıǵaǵy. «Aýyzy qısyq bolsa da, baıdyń balasy sóılesin» bop turǵan qoǵamǵa kelip, Qazaqstannyń túkpir-túkpirinen zaýyt, fabrıkasyn ashyp jatqan olar erkelemegende kim erkeleıdi dersiz... Degenmen, qazaqtyń jerinde tek qazaqtardyń ǵana «erkeleýge» quqyǵy bar! Sonymen qatar, dál osy quqyqty qorǵap qalatyn da ózimiz ekenin umytyp bara jatqandaımyz.
Bizdiń elimizge qonaqtap kelgen qytaılarǵa kórsetiletin qurmetke qarap turyp, Qytaıdaǵy qazaqtardyń jaǵdaıyn eriksiz eske túsiresiń. Sáti túskende azý tisin aıaýsyz basyp qalyp otyrǵandary ótirik emes. Dál osyndaı kezeńde bizge keletin qytaılardyń jaǵdaıyn jaqsartýǵa jumsaǵan qarjyny jınap qoıyp, ózge elde óz elin ańsap júrgen tym bolmasa on otbasyny kóshirip alyp kele berse ǵoı dep armandaısyń.
Basymyzǵa kún týa qalsa, tek qazaq qana qazaq úshin qasyq qanyn qıa alady emes pe?!
Kóńil kókjıegine úmit pen kúdik óz uıalaryn qatar salyp qoıǵaly biraz bolǵan. Eń qıyny: Kúdiktiń uıasy keńge jaıylyp, qudiretin kóbeıtip jatyr da, - Úmittiń uıasy kún ótken saıyn kishireıip barady, biraq sáýlesi jap-jaryq.
Abylaı hannyń túsindegideı «qurt-qumyrsqaǵa» aınalyp ketpesek bolǵany...
Qazaqtyń dalasynda qansha ult ókili ǵumyr keshse de, bul dalanyń órligi óziniń týǵan balalaryna ǵana taraıdy! Atadan qalǵan asqar rýh, anadan qalǵan ǵajap aqyl ananyń sútimen, ákeniń kúshimen, shynynda, taralǵan bolsa, qazaq qazaq bolýyn toqtatpaıdy!
Avtory: Orazhan Aqtolqyn
