M.Shahanov óz atynan jalǵan paraqsha ashqan azamattardy sotqa bermek. Bul týraly Qamshy aqparattyq agenttigi  Matrısa aqparattyq saıtynyń málimetine súıene otyryp habarlaıdy.

Belgili qoǵam qaıratkeri eshqandaı áleýmettik jelilerge tirkelmegenin jıi aıtatyn. Alaıda, aqynnyń aıtýyna qaraǵanda onyń atyn jamylyp alǵan jalǵan paraqshalardyń sany búginde 56-ǵa jetipti.

"Keıingi kezderi ǵalamtordaǵy áleýmettik jelilerde meniń atymnan paraqsha ashyp alýshylar tym kóbeıip ketipti. Maǵan tilektes, nıettes adamdar sanaǵan eken, olardyń jalpy sany 56-ǵa jetipti. Tipti bılik basynda júrgen keıbireýlerdiń shetelderde qansha úıi bar ekenin de meniń atymnan jiberipti. Sózdiń ashyǵyna kelsek, meniń bir de bir paraqsham joq. Ǵalamtor arqyly bireýge bir aýyz sóz jazyp kórgen adam emespin. Ǵalamtordy meńgerýge endi ǵana kiriskeli otyrmyn" dedi aqyn Muhtar Shahanov. 

Sondaı-aq aqyn esimi men bedelin paıdalanyp, jalǵan paraqsha ashqan alaıaqtardyń osyndaı jónsiz  áreketin toqtatpasa sotqa shaǵymdanatynyn málimdedi. 

Sholýshy: Aqerke Maratqyzy