«Tegin medısınalyq kómektiń kepildi kólemi aıasynda halyqty dárilik zattarmen qamtamasyz etý jáne Qazaqstan Respýblıkasyndaǵy farmasevtıkalyq salanyń jaǵdaıy men damýy týraly» Parlamenttik tyńdalymnyń usynymdary aıasynda 2017 jyldyń 23 maýsymynda saǵat 11:00-de Almaty qalasynda Túlkibas k., 4A mekenjaıynda ornalasqan «A» sanatyna jatatyn jańa qoıma kesheniniń resmı ashylý saltanaty ótti dep habarlaıdy Qamshy aqparattyq agenttigi. İs-sharaǵa QR densaýlyq saqtaý mınıstrliginiń birinshi vıse-mınıstri Soı A.V., «Medservıs Plús» QFK basqarma tóraǵasy Omarov J.K., QR Parlament májilisiniń depýtaty Amanjolova Z.D., Sheteldik óndirýshiler qaýymdastyǵynyń prezıdenti Lokshın V.N., Eýropa qaıta qurý jáne damý banki dırektorynyń orynbasary Namazbaev A. jáne t.b. laýazymdy tulǵalar qatysty.
Dárilik zattardy, medısınalyq maqsattaǵy buıymdar men medısınalyq tehnıkany qabyldaý, saqtaý jáne bosatýǵa mamandandyrylǵan bul zamanaýı farmasevtıkalyq qoıma Germanıada shyǵarylǵan zamanaýı jabdyqpen jáne qoıma tehnıkasymen GDP (tıisti dıstrıbútorlyq tájirıbe) standarttaryna sáıkes jabdyqtalǵan. Keshen Almaty qalasyn jáne oblys turǵyndaryn qaýipsiz ári sapaly dárilik zattarmen, medısınalyq maqsattaǵy buıymdarmen jáne medısınalyq tehnıkamen qamtamasyz etýge múmkindik bermek.
Taýarlardy 7 deńgeıli bıik stellaj túrindegi paletalarda saqtaıtyn (22 metrge deıin jetedi) «A» sanatyna jatatyn bul farmasevtıkalyq keshen qoımanyń paıdaly aýdanyn barynsha ońtaıly túrde qoldanýǵa múmkindik beredi. Qoımanyń jalpy aýdany 6 282 sharshy metrdi quraıdy. Qoımada 6 500 palleta-oryn jáne sórede saqtaýǵa arnalǵan 7 000 oryn (sonyń ishinde 5 600 oryn jáne temperatýra rejımin saqtaıtyn 1 400 oryn) bar.
Keshen ortalyq kólik joly janynda ornalasqan. İshindegi bólmejaılarynyń jalpy aýdany 8 778 m2 quraıtyn qoıma ártúrli aımaqtarǵa bólingen. Ónimdi saqtaıtyn aımaqtarda temperatýra rejımin retteýge bolady. Qoımanyń ishindegi jaǵdaı dárilik zattar, medısınalyq maqsattaǵy buıymdar men medısınalyq tehnıkany saqtaýǵa qoıylatyn halyqaralyq standarttardyń eń joǵarǵy talaptaryna jaýap beredi. Jańa qoıma bólme temperatýrasynda (+15-+25 S°) saqtaıtyn, arnaıy temperatýrada saqtaýǵa (+2…+8 S°) arnalǵan jáne + 8…+15 S temperatýra rejıminde saqtaýǵa múmkindik beretin aımaqtarmen jabdyqtalǵan.
Dárilik zattardy saqtaý kezinde naqty bir sharttar talap etiletindikten, dári-dármek erekshe taýar tobyna jatady. Preparattardyń tıimdiligi men qaýipsizdigi osy sharttardyń qanshalyqty muqıat ári múltiksiz saqtalatynymen baılanysty, demek dári-dármekpen emdeý nátıjesi de osyǵan soǵurlym táýeldi bolady.
«Medservıs Plús» kompanıasy Almaty qalasy men oblysyndaǵy klıentterge qyzmet kórsetetin qosymsha alań retinde óziniń zamanaýı avtomattandyrylǵan farmasevtıkalyq qoımasyn ashý arqasynda eń joǵary deńgeıde logıstıkalyq qyzmetti kórsetip, naryqta básekeli artyqshylyqtarǵa ıe bolýǵa múmkindik alyp otyr. SAP EWM júıesiniń (Germanıa) basqarýymen jumys jasaıtyn avtomattandyrylǵan SSI SCHAEFER konveıerlik jelisiniń (Avstrıa) arqasynda taýarlar bazaǵa avtomatty túrde engizilip, qoımalar men qoıma ishindegi operasıalardy, sonyń ishinde taýardy qabyldaý jáne jóneltý kestesin qurýdy, sáıkestilikti avtomatty túrde tańbalaıtyn operasıalardy, ilespe qujattardy daıyndaýdy jyldam basqaryp, san alýan strategıalardy baptaýǵa bolady. Bul qoıma ishindegi operasıalardyń atqarylý deńgeıi men shapshańdyǵyn aıtarlyqtaı arttyrady. Jańa keshen «Medservıs Plús» QFK-nyń ónimderdi saqtaý, taýar qoryn ońtaıly kólemde qamtamasyz etýmen baılanysty qajettilikterin tolyǵymen qanaǵattandyrmaq. Qoımanyń konfıgýrasıasy taýar qoryn ıkemdi túrde basqaryp, naryqtyń ósip kele jatqan qajettilikterine jaýap berýge múmkindik beredi. «Medservıs Plús» jol kartasyna sáıkes QR-daǵy barlyq fılıaldaryn GDP standarttaryna birtindep kóshirýde.
Zamanaýı logıstıkalyq ortalyqtyń ashylýy arqasynda jańa 70 jumys orny quryldy. Kompanıanyń asa mańyzdy maqsattarynyń biri halyqty jumyspen qamtýǵa, sondaı-aq, qazaqstandyqtardyń ál-aýqatyn kóterýge úles qosýǵa baǵyttalǵan.
GDP standarty jóninde
«Tıisti dıstrıbútorlyq tájirıbe» standarty (Good Distribution Practice - GDP) dárilik zattardy kóterme baǵada ótkizý úrdisin uıymdastyrýǵa arnap tıisti tásildemeni belgileıdi. Bul standart dári-dármek óndirisshiniń kásipornynan shyqqan sátten bastap, bólshektep satatyn dárihanalarǵa jáne medısınalyq mekemelerge jetkizýge deıingi kezeńde preparattardyń sapasy men tıimdiligin saqtaýdy kózdeıdi. Standart Eýroodaq jáne Dúnıejúzilik densaýlyq saqtaý uıymy qabyldaǵan tıisti dıstrıbútorlyq tájirıbe qaǵıdalaryna negizdelgen.
