Qazaqstan Prezıdenti Nursultan Nazarbaev Dúnıejúzi qazaqtarynyń V quryltaıyna qatysty dep habarlaıdy Qamshy.kz Aqordanyń aqparatyna súıenip.

Memleket basshysy Astanaǵa álemniń 39 elinen kelgen Dúnıejúzilik quryltaıdyń barlyq qatysýshylaryna arnap sóz sóıledi.

Elbasy alǵashqy Quryltaı ótkennen bergi 25 jyl ishinde Qazaqstannyń jetken jetistikterin jáne elimizde júrgizilgen reformalardy atap ótti.

Nursultan Nazarbaev rýhanı jańǵyrý aıasynda iske asyrylyp jatqan 6 jobaǵa, sonyń ishinde qazaq qarpiniń latyn álipbıine kóshýi, gýmanıtarlyq baǵyttaǵy úzdik 100 oqýlyqty qazaq tiline aýdarý, «Týǵan jer», «Qazaqstannyń kıeli jerleriniń geografıasy», «Jahandaǵy zamanaýı qazaqstandyq mádenıet», «Qazaqstandaǵy 100 jańa esim» sıaqty jobalarǵa erekshe toqtaldy.

Qazaqstan Prezıdenti memleketimiz ben qoǵam tarapynan qandastarymyzdy qoldaýdyń mańyzdylyǵyn aıtyp, «Otandastar» qoryn qurýdy tapsyrdy.

– Qor Dúnıejúzi qazaqtarynyń qaýymdastyǵymen birlesip, qandastarymyzǵa qoldaý kórsetýdiń tetikterin anyqtap, tıisti keshendi baǵdarlama ázirleýi qajet, – dedi Elbasy.

Sondaı-aq, Memleket basshysy elshilikterge Qazaqstanǵa oralýshylardyń qujattaryn daıyndaý jáne olarǵa keńes berý jónindegi jumystardy kúsheıtýdi tapsyrdy.

– Sonymen qatar, jastarǵa qoldaý kórsetý qajet. Úkimetke otandastarymyzdyń joǵary bilim alýyn qoljetimdi etý úshin olarǵa bólingen kvotany 2 ese kóbeıtýdi tapsyramyn. Úkimet sheteldegi qandastarymyzdyń ana tilinde bilim alý múmkindikterin qarastyrýy kerek, – dedi Nursultan Nazarbaev.

Budan bólek, Qazaqstan Prezıdenti irgeles elderde memlekettik telearnalardyń kórsetilýi men merzimdi baspasózdiń taralý máselelerin pysyqtaý, qandastarymyz arasyndaǵy daryndy jáne kásibı mamandardy elge tartyp, olardy beıimdeý tetikterin qarastyrý, elimizdiń ońtústiginen soltústik oblystaryna qonys aýdarý baǵdarlamasyna qatysqan azamattarymyzdyń ornalasýyna jaǵdaı jasap, olardy jumyspen qamtý jóninde tapsyrmalar berdi.

Elbasy sóziniń sońynda Quryltaıǵa qatysýshylarǵa Astanany aralap kórip, «EKSPO-2017» mamandandyrylǵan kórmesin tamashalaý jóninde usynys aıtty.

Quryltaı sońynda Memleket basshysy sheteldegi aǵaıynnyń Atamekendi umytpaı, ony árdaıym qurmet tutýǵa shaqyrdy.

– Sheteldegi qazaqtardyń elge jıi kelip, týǵan jerimen baılanystaryn nyǵaıtyp otyrǵany durys. Qaı elde tursańyzdar da, árdaıym Qazaqstandy júrekterińizdiń tórinde ustańyzdar. Qazaqtyń tarıhı otany bireý-aq. Ol – Qazaqstan, – dep túıindedi Nursultan Nazarbaev.