Shymkentte munaı bazasynda órt bolyp, bir adam qaza tapty dep jazady otyrar.kz. Qaıǵyly jaǵdaı búgin tańerteń saǵat 7 shamasynda bolǵan. Marqum benzınniń mólsherin anyqtaý úshin sısternanyń qaqpaǵyn ashqan kezde jarylys bolǵan degen aqparat bar. Jaraqat alǵan adam birden opat bolady. Aldyn ala boljamdardyń birinde qaýipsizdik tehnıkasy saqtalmaǵan degen nusqa tekserilýde. Jarylystan keıin órt shyǵyp, AI-92 markaly benzınniń myńdaǵan tonnasy janyp ketti.

Bul kórinisti kýágerler túsiripti. Órt aldymen munaı bazasyndaǵy úsh jarym tonnalyq rezerýardan shyqqan. Boljam boıynsha bazada jumys istep júrgen er adam qatty jarylystyń saldarynan órt shyqqan sısternaǵa qulap, tirideı janyp ketken. Qyzyl jalynnyń qatty sharpyǵany munaı bazasy mańyndaǵy turǵyndardy da shoshytyp jibergen.

Tótenshe jaǵdaı qyzmetkerleri qyzyl jalyndy áreń sóndirýde. Oqys oqıǵa kezinde 35 tehnıkamen men 200-ge tarta qyzmetker jumyldyryldy. Alaıda, munymen órttiń beti beri qaıtqan joq. Qyzyl alaýdy óshirý úshin qosymsha órt sóndirý poıyzy jumyldyrylǵan. Bul tehnıka arqyly 100 tonna sý men 1,5 tonna kóbik jetkizildi.

Munaı bazasyndaǵy órttiń shyǵý sebebi ázirge belgisiz. Quzyrly organ ókilderi arnaıy tekserý jumystaryn júrgizýde. Oqıǵa ornynda 10-ǵa jýyq jedel járdem qyzmetiniń kóligi qas qaraıǵanǵa deıin kezekshilikte turdy. Tańǵy segizden bastalǵan órt tótenshelikterdi biráz ábigerge túsirdi. Tipti qutqarýshylar aýa raıynyń qolaısyzdyǵynan on bes mınýtqa órt sóndirý jumystaryn toqtatqan.

Munaı bazasyndaǵy órtti qutqarýshylar áli sóndirýde. Tipti sý jetkize almaı álek boldy. Sondyqtan, tótenshelikter baza mańyndaǵy aryq-kanaldardan sý alyp, qyzyl jalyndy sóndirýge kiristi.

Laýra Nahypqyzy