Japon kolonızatorlary qýylǵannan keıingi alǵashqyjyldary (1945-1948) kóptegen jazýshylar óz shyǵarmalarynda eliniń táýelsizdiginen úmit etti (Lı Ha Iýn (1902 jyly týǵan), Kım Sop (1906 jyly týǵan), Iýchı Hvandardyń (1897-1967) óleń jınaqtary). 1948 jyldan bastap ádebıette antıkomýnıstik tendensıa kúsheıdi. Prozaıkterdiń aǵa býyn ókilderi (Em San Sop, Chý E Sop, Lı Mý En) natýralısik jáne dekadentik ádebıet dástúrlerin jalǵastyrýda. 1954 jyldan beri fransýzdyń ekzıstensıalızmi men «jańa syn» konsepsıasy, t.b. aǵymdardyń áserindegi jas jazýshylar boı kórsete bastady. Soǵys, toryǵý, zaryǵý jáne absýrdtyq taqyryby Kım Son Han (1919 jyly týǵan), Soný Hvılerdiń (1922 jyly týǵan) problemalyq prozalarynda beleń aldy. Lı Don Djı men Lı Hen Gıdiń prozalarynda mıstısızm jáne arnaıy «shyǵyssha oılaý» baǵytyndaǵy izdenister kezdesedi. 1960 jyly apreldegi kóterilisten keıin ádebıette progresshil tendensıalardyń qaıtadan jandanýy baıqaldy. Ońtústik Koreıa shyndyǵyn synaıtyn, bylaısha aıtqanda qatysý ádebıeti damı bastady.