Oralda bloger Aıbolat Bókenovke qatysty QR QK-niń 274-baby 2-bóligine sáıkes (kórineý jalǵan aqparat taratý) qylmystyq is qozǵaldy, dep habarlaıdy Qamshy.kz aqparat agenttigi QazAqparatqa silteme jasaı otyryp.
Oblystyq İİD-niń baspasóz qyzmetinen túsken málimetke qaraǵanda, «Jasulan-flora» JSHS basshysy Aıdar Nurǵojaevtyń aryzy negizinde Oral qalalyq ishki ister basqarmasynyń tergeý bólimi qylmystyq is qozǵap, qazirgi kezde sotqa deıingi tergeý amaldary júrgizilýde. QR Qylmystyq is júrgizý kodeksiniń 24-baby talaptary negizinde istiń mán-jaıyn tolyq anyqtaý maqsatynda A.Bókenovtiń uıaly telefonyn alý jóninde sheshim qabyldandy. Qajetti tergeý amaldary júrgizilgennen keıin uıaly telefon ıesine qaıtaryldy.
Osyǵan qatysty A.Bókenov óz pikirin bildirdi. «BNews.kz pen 24.kz saıttarynan «V Ýralske poıavıtsá pervaıa svetochnaıa pıramıda» degen aqparatty kórdim. Onda bul maqsatqa 25 mln teńge jumsalmaq delingen. Soǵan tańǵalyp, áleýmettik jelidegi paraqshama «Mıllıondardy jyltyraqqa shashyp, jurtty aldaǵansha, osy qarajatqa qalamyzdyń bir kóshesin jóndegeni durys bolar ma edi» degen pikir jazyp edim. Sol úshin maǵan jalǵan aqparat tarattyń degen aıyp taǵylyp otyr. Endeshe, sol aqparatty bergen «Habar» telearnasy men BNews.kz saıtyn nege jaýapqa tartpaıdy? Osyǵan baılanysty Oral qalalyq ishki ister basqarmasy tergeý bóliminiń tergeýshisi, polısıa aǵa leıtenanty Erjan Jaqsyǵalıev qaýly shyǵaryp, uıaly telefonymdy alyp, keıin qaıtaryp berdi», - dedi A.Bókenov. Oral qalalyq turǵyn úı-kommýnaldyq sharýashylyǵy jáne turǵyn úı ınspeksıasy bólimi basshysynyń orynbasary Mıras Múlkáıdiń sózine qaraǵanda, gúldi pıramıdany salýǵa búdjetten qarajat jumsalǵan joq. Ol tarazdyq kásipker Aıdar Nurǵojaevtyń óziniń usynysymen salyndy. Iaǵnı qalaǵa jasaǵan tartýy deýge bolady.
Sholýshy: Ásel Bolatqyzy
