11 shildede Tallınde Qazaqstan Respýblıkasynyń Fınlándıa Respýblıkasyndaǵy jáne Estonıa Respýblıkasyndaǵy Tótenshe jáne Ókiletti Elshisi qyzmetin qosa atqaryp otyrǵan Murat Nurtileýov Estonıa Respýblıkasynyń Prezıdenti Kerstı Kalúlaıdqa senim gramotasyn tapsyrdy, dep jazady Qamshy.kz aqparat agenttigi. Bul týraly QR SİM baspasóz qyzmeti habarlaıdy.
Saltanatty rásimnen keıin Estonıa Prezıdenti qazaqstandyq dıplomatıalyq ókildik basshysyn Kadrıorg saraıynda qabyldap, Qazaqstan-Estonıa is-qımylynyń ózekti máseleleri men onyń perspektıvalaryn talqylady.
QR Prezıdenti Nursultan Nazarbaevtyń ekijaqty dıplomatıalyq qatynastardyń 25 jyldyǵyna (1992 jylǵy 27 mamyr), sondaı-aq Estonıanyń Eýropalyq odaqtaǵy tóraǵalyǵyna oraı K. Kalúlaıdqa joldaǵan eń izgi nıet-tilekteri men quttyqtaýlaryn jetkizip, Elshi elderimizdiń ekijaqty jáne kópjaqty formattardaǵy ózara tıimdi yntymaqtastyq aıasyn Astana ári qaraı keńeıte túsýge múddeli ekenin rastady.
Óz kezeginde, Estonıa Prezıdenti jetkizilgen quttyqtaýlar úshin shynaıy alǵysyn bildirip, Qazaqstan Prezıdentiniń eki el arasyndaǵy dostyq baılanystardy nyǵaıtýdaǵy erekshe róli men orasan zor úlesin atap ótti. Onyń pikirinshe, shırek ǵasyr ishinde eki el birlesken jumys arqyly birizdi saıası dıalog pen saýda-ekonomıkalyq kooperasıany damytýda qomaqty jetistikterge qol jetkizdi. Osy oraıda, ekonomıkalyq trektiń áleýetin arttyrý turǵysynan kólik jáne tranzıt, aqparattyq tehnologıalar, bilim jáne ǵylym, densaýlyq saqtaý, sondaı-aq agroónerkásip salalaryndaǵy ortaq jobalardy júzege asyrý mańyzdy bolyp tabylady.
M. Nurtileýov Estonıa basshysyna Prezıdent N. Nazarbaevtyń elimizdegi keshendi demokratıalyq reformalardy tereńdetýge, ekonomıka men qoǵamdyq sanany jańǵyrtýǵa baǵyttalǵan bastamalaryn ımplementasıalaý barysy jóninde jan-jaqty aqparat berdi. Bul turǵyda, «100 naqty qadam» Ult jospary, «Nurly jol» JES, IIDMB men «Bolashaqqa baǵdar: qoǵamdyq sanany jańǵyrtý» atty baǵdarlamalyq maqalasynan týyndap otyrǵan bıik maqsattarǵa úlken qyzyǵýshylyq tanytyldy.
Taraptar atalǵan strategıalyq qujattar ekijaqty yntymaqtastyqty jańa deńgeıge kóterýge tyń múmkindikter týdyratynyna senimdi.
Óńirlik jáne jahandyq kún tártibindegi problemalar boıynsha pikir almasý barysynda Elshi Qazaqstannyń halyqaralyq qaýipsizdik pen turaqty damýdy qamtamasyz etýdi kózdeıtin bastamalary men naqty úlesi jaıly sóz qozǵady. Sonyń ishinde, Astananyń Ýkraına jáne Sırıa daǵdarystaryn retteýdegi bitimgershilik mısıamyzǵa nazar aýdaryldy.
Sonymen qatar, M. Nurtileýov Qazaqstannyń BUU Qaýipsizdik Keńesindegi basymdyqtaryna, Astanada maýsym aıynda ótken SHYU samıtiniń qorytyndylaryna, sondaı-aq «EKSPO-2017» Halyqaralyq mamandandyrylǵan kórmesiniń qyzmetine tolyqqandy toqtaldy.
Odan basqa, qazaqstandyq dıplomat estondyq tarapqa Qazaqstan men Eýropalyq odaq arasyndaǵy Keńeıtilgen áriptestik pen yntymaqtastyq týraly kelisimdi ratıfıkasıalaý prosesin tezdetý týraly ótinish bildirdi.
K. Kalúlaıd Qazaqstannyń táýelsizdik jyldaryndaǵy saıası jáne áleýmettik-ekonomıkalyq modernızasıalaýdaǵy tolaǵaı tabystaryn joǵary baǵalap, elimizdiń halyqaralyq beıbitshilik pen turaqtylyqty qamtamasyz etýge qosqan qomaqty úlesi dúnıejúzilik qoǵamdastyq músheleri tarapynan keńinen qoldaý tapqany men moıyndalǵanyn málimdedi.
Estonıanyń memleket basshysy Astanamen dástúrli tyǵyz ári syndarly qarym-qatynastardy óristetýge Tallın daıyn ekenin, Eýropalyq odaq Keńesine tóraǵalyq etetin el Prezıdenti retinde Eýroodaq sheńberindegi etene jumysty jalǵastyrýǵa beıildiligin rastady.
Suhbat sońynda K. Kalúlaıd Qazaqstan Prezıdenti N. Nazarbaevqa jáne barsha Qazaqstan halqyna sáttilik, gúldený jáne mol ıgilikter tiledi.
Sholýshy: Gúlim Jaqan
