Sportqa daryndy balalarǵa arnalǵan mamandandyrylǵan oblystyq mektep-ınternatynyń oqýshysy Erlan Ońalov Qyrǵyzstan astanasy Bishkek qalasynda dzúdodan ótip jatqan Azıa chempıonatynyń qola júldegeri atandy, dep habarlaıdy Qamshy.kz aqparattyq agenttigi QazAqparatqa silteme jasaı otyryp.
Atalmysh mekteptiń ádiskeri Gúldarıa Sısenovanyń aıtýynsha, Erlan 50 kg salmaqta alǵashqy beldesýinde ózbek palýany Maqsot Ochılovty ıppon ádisimen taza jeńdi. Sodan keıin jartylaı fınalda mońǵol sportshysy Tımýdjın Ganbýrgetke jol berdi. Úshinshi oryn úshin básekede Tájik eliniń ókili Sharıfbek Nábıevti tize búktirdi. Ergen Ýsmanov pen Narıman Bekqalıev jattyqtyratyn sport sheberligine úmitker Erlan Ońalov - talaı dodada olja salyp júrgen palýan, sonyń ishinde qos dúrkin el chempıony, Eýropa kýbogynyń eki márte qola júldegeri. Sonymen qatar 2016 jyly Iakýtıadaǵy «Azıa balalary» oıyndary men Túmen qalasynda 2000-2002 jylǵy jasóspirimder arasynda ótken halyqaralyq týrnırde de qola medalǵa ıe boldy.
