Almatyda tek japon kólikterin urlaıtyn qylmystyq top paıda bolǵan. Úsh aıdyń ishinde qylmyskerler bir yqshamaýdannan segiz “Toıotany” qoldy qylypty. Qazirge deıin urlyqshylardyń eshbiri qolǵa túspegen. Bul týraly Qamshy.kz aqparat agenttigi  KTK málimetine súıenip habarlaıdy.

“Sıgnal júıesi bolǵan, biraq ol jumys istemedi. Púlt arqyly qaraǵanymda kóliktiń jabyq turǵany anyq kóringen. Biraq, tańerteń shyqqanymda joq”, – deıdi Maıgúl Mustafına.

Maıgúl osydan soń barlyq jerge kóliginiń urlanǵany týraly habarlamalar ilip tastaǵan. Osydan soń oǵan urlyq kýágerleri emes, týra ózi sıaqty zardap shekkender habarlasa bastapty. Aqyrynda kóliginen aıyrylǵan 8 adam da Aqsaı yqshamaýdanyndaǵy kórshi úılerde turatyndar bolyp shyqty. Tipti kólikterdiń keıbiri ýchaskelik polısıa ǵımaratynyń da aldyna qoıylǵan eken.

“Kóligimdi túngi saǵat úshte urlap ketti. Óıtkeni sol kezde kóligimniń dabyl júıesi eki ret qońyraýlatty. Al tańerteń mashınamdy tappaı qaldym”, – deıdi Bıbijamal Sansyzbaeva.

Bir qyzyǵy bul aýdannan urlanǵan kólikterdiń barlyǵynyń markasy – “Toıota”.

“Toıota” – Qazaqstandaǵy eń tanymal avtokólik markasy. Ol óte tanymal bolǵandyqtan ony urlanǵan mashına retinde satý ońaı. Nómirdi óte sátti aýystyryp jiberetin mamandar bar. Al bizdiń eldiń polısıasynyń ol nómirdiń jalǵan ne shyn ekenin anyqtaıtyn múmkindigi tómen”, – deıdi Qazaqstannyń táýelsiz avtokólik odaǵynyń tóraǵasy Edýard Edokov.

Ázirge polıseıler barlyq áreketti jasaǵanymen, urlyqshylardy qolǵa túsire alatyn emes.

“Bul kólikterdiń qandaı maqsatta urlanǵanyn jáne keıin qaıda aparylǵanyn biz mindetti túrde anyqtaımyz. Qazirgi kezde jedel-izdestirý sharalary júrgizilip jatyr,” – dedi Almaty qalalyq İİD resmı ókili Saltanat Ázirbek.

Jyl basynan beri Almatyda 155 kólik urlanǵan. Kásibı urylarda kóliktiń dabyl júıesin joıyp, ony kiltsiz-aq ashatyn múmkindik bar eken.

“Zardap shekpes úshin túrli mehanıkalyq múmkindikterdi paıdalaný kerek. Iaǵnı, mashınany elektr kózinen jáne qýattan aıyryp tastaı alatyn kólik róline qupıa batyrma ornatý degen sekildi. Sondaı-aq, zamanaýı dabyl júıesi kólikti buǵattap tastaıtyn múmkindik beredi. Olar urlap áketkenimen de qojaıyn ornatqan júıeniń arqasynda ol kólik báribir júrmeı qalady”, – deıdi Edýard Edokov.

Kólikti urlyqtan saqtaý úshin oǵan júrisin qadaǵalaıtyn arnaıy tetik ornatyp, mashınany beınebaqylaý kameralary bar tusqa qoıý kerek.