Jumys sapary aıasynda QR Premer-mınıstri Baqytjan Saǵyntaev Qazaqstandaǵy munaı ónimderin óndiretin iri kásiporyndardyń biri - «Pavlodar munaı-hımıa zaýyty» JSHS-in jańǵyrtý barysyn tekserdi, dep habarlaıdy Qamshy.kz aqparat agenttigi QR Premer-mınıstriniń baspasóz qyzmeti silteme jasap.

Pavlodar munaı-hımıa zaýytyn jańǵyrtý Indýstrıalyq-ınnovasıalyq damytý memlekettik baǵdarlamasy boıynsha júrgizilip jatyr jáne basqarý júıesin avtomattandyrýdan, energıa únemdeıtin jáne ekologıalyq taza tehnologıalardy engizýden turady, bul shıki munaıdy qaıta óńdeý boıynsha ónimdilikti arttyrýǵa múmkindik beredi. «Pavlodar munaı-hımıa zaýyty» JSHS bas dırektory Shýhrat Danbaı jańǵyrtýdy aıaqtaǵannan keıin joǵary oktandy benzın óndirisi 297 myń tonnaǵa ulǵaıatynyn, sondaı-aq halyqaralyq Jet A1 standartty avıaotyn óndirisi qamtamasyz etiletinin baıandady.

PMHZ jańǵyrtý jobasy boıynsha 12 tehnologıalyq qondyrǵy men 16 jalpy zaýyttyq sharýashylyq nysany salynyp jáne jóndelip jatyr. Jańǵyrtýdan keıin aqshyl munaı ónimderi óndirisi jylyna 333 myń tonnaǵa artady. Zaýytty jańǵyrtý aıasynda sondaı-aq qoldanystaǵy qondyrǵylardy jóndeý júrgizilýde, bul aǵymdaǵy jyldyń sońynda K4, K5 standartty dızel otynyn jáne avıasıalyq otyn óndirýdi bastaýǵa múmkindik beredi.

Jalpy, PMHZ jańǵyrtý tutynýshylardy sapaly munaı ónimderimen qamtamasyz etýge jáne jańa tehnologıalar engizý, basqarýdy avtomattandyrýdy arttyrý esebinen qorshaǵan ortaǵa júktemeni azaıtýǵa múmkindik beredi.

Eske salaıyq, «Pavlodar munaı-hımıa zaýyty» JSHS – Qazaqstan Respýblıkasynyń úsh munaı óńdeý zaýytynyń biri. Zaýytta 19000-den astam adam jumys jasaıdy. Búgingi tańda kásiporynnyń óndiristik qýaty jylyna 5,1 mln. tonna munaıdy quraıdy. Kásiporyn Qazaqstannyń ishki naryǵyn munaı ónimderimen qamtamasyz etedi, sondaı-aq Reseı, Ózbekstan, Qytaı, AQSH, Nıderlandy, Italıa, Ýkraına sıaqty elderge ónimder jetkizedi.