Izraıldiń Ierýsalım qalasynda jappaı tártipsizdikter oryn alyp nátıjesinde 377 adamǵa deıin zardap shekken. Musylmandar men polıseıler arasynda bolǵan ereýil sońy qaqtyǵysqa ulasyp, saldarynan 3 adam qaza tapty dep habarlaıdy Qamshy.kz aqparat agenttigi Rentv-ǵa silteme berip. Qyzyl Jarty aı qoǵamynyń deregi boıynsha, marqumdardyń barlyǵy – palestınalyqtar. Al japa shekkender qatarynda ızraıldikter de bar. Ótken aptada shaharda qarýly shabýyl jasalyp, ızraıldik 2 polıseı kóz jumdy. Osydan keıin jergilikti bılik «Ierýsalımniń eski qalasy» aýdanynda qaýipsizdik sharalaryn kúsheıtti. Halyqtyń ashýǵa minýine osy jaıt sebep bolǵan. Óıtkeni munda musylmandar, hrıstıandar men ıýdıler úshin qasıetti oryndardyń biri ornalasqan. Jańa erejege saı metal izdegish quraldar ornatylyp, qatynas edáýir qıyndaǵan. Sońǵy málimetke súıensek, jaǵdaıdyń ýshyǵýyna baılanysty Palestına basshysy Mahmud Abbas Izraılmen barlyq deńgeıdegi qarym-qatynasty toqtatatynyn jarıa etti.