Pavlodarda aýyl turǵynyna tórt ret pyshaq salǵan polıseı aıyppulmen qutyldy, - dep habarlaıdy Qamshy.kz aqparat agenttigi Tengrinews.kz saıtyna silteme jasap.  

Pavlodarda 34 jastaǵy polıseıge qatysty sot úkimi shyqty, ol óziniń jaryn áriptesinen qyzǵanyp, shabýyl jasaǵan. Polısıa qyzmetkerine adam óltirýge oqtalý jáne zańsyz sýyq qarý ustaý baptary boıynsha aıyp taǵyldy. Alaıda sot barysynda "Densaýlyqqa qasaqana aýyr zıan keltirý" babyna aýystyrylǵan. 

Jabyq túrde ótken sot barysynda, arnaıy saraptama taǵaıyndalǵan. Onda polıseıdiń aýyl turǵynyna shabýyl jasaǵan ýaqytta afekti qalpynda bolǵanyn anyqtaǵan. "Sot aıyptalýshyny "Afekti qalpynda densaýlyqqa qasaqana aýyr zıan keltirý" baby boıynsha kináli dep tapty. Sot úkimine sáıkes, eki jaqtyń mámilege kelýine oraı, aıyptalýshy qylmystyq jaýapkershilikten bosatyldy. Sonymen qatar, ol sýyq qarý saqtaǵany úshin 45 AEK (102 myń 105 teńge) aıyppul salyndy", - dep oqydy Pavlodar oblystyq mamandandyrylǵan aýdanaralyq qylmystyq ister sotynyń sýdıasy Nurlan Aıtbaev. 

Sot úkimi jarıalanǵannan keıin, bıylǵy jyldyń qańtarynan beri qamaýda bolǵan kúdikti sot zalynan bosatyldy. Aıta keteıik, zardap shekken adam Aqtoǵaı aýylynyń turǵyny Qoja Maǵzam esimdi azamat. Ol úsh aı boıy aýrýhanada jatqan, al oǵan shabýyl jasaǵan qaskóı ýaqytsha ustaý ızolátoryna jabylǵan.