Ońtústik Qazaqstan oblysynda UBT-dan 100-den joǵary bal jınaǵan oqýshylar sany 4113-ke jetti. Bul ótken jylmen salystyrǵanda 675 oqýshyǵa artyq. Al 100-den 120 balǵa deıin jınaǵandar sany – 3004, 121 men 140 bal aralyǵynda jınaǵandar – 1109 oqýshyny qurady. Bul týraly ulttyq biryńǵaı testileý men qabyldaý emtıhandarynyń qorytyndylary talqylanǵan úkimettiń kezekti selektorlyq otyrysynda belgili boldy. Onlaın ótken jıynǵa oblys ákimi Janseıit Túımebaev jáne óńirdegi sala jetekshileri qatysty, dep habarlaıdy Qamshy.kz aqparat agenttigi OQO ákiminiń baspasóz qyzmetine silteme jasap.

Jalpy respýblıka boıynsha UBT-ǵa 88 595 túlek qatysyp, baq synaǵan. Bul ótinim bergenderdiń 95 paıyzyn qursa, testileý qorytyndysyna sáıkes respýblıka boıynsha ortasha kórsetkish 80,5 baldy qurady.

Al Ońtústik Qazaqstan oblysy boıynsha 2016-2017 oqý jylynda 11 synypty 32 871 oqýshy bitirdi. Olardyń 21 668 nemese 78,2 paıyzy ulttyq biryńǵaı testileý tapsyrýǵa ótinish berip, 21 323 bitirýshi testileýge qatysqan. Testileýge qatyspaǵan 345 oqýshynyń 312-i óz ótinishimen, 29 densaýlyǵyna baılanysty, al 4 oqýshy Qazaqstan Respýblıkasy bilim jáne ǵylym mınıstrliginiń buıryǵymen (halyqaralyq olımpıada jáne ǵylymı joba jeńimpazy) UBT-dan bosatylǵan. 2017 jylǵy UBT qorytyndysymen oblystyq túlekterdiń ortasha kórsetkishi 76,8 baldy qurady.

Bıyl UBT erejesine sáıkes test tapsyrǵan 21 323 bitirýshiniń 882 nemese 4 paıyzy shyǵarmashylyq emtıhanǵa qatysty. Shekti deńgeıden ótpegen ıaǵnı 50 baldan tómen jınaǵan oqýshylar sany – 2 776. Mejelik deńgeıden ótpegender testileýden qaıtadan óte alady. Qujattardy qabyldaý 1-8 tamyz aralyǵynda, al testileý 19-24 tamyz aralyǵynda ótedi. Talapker mejelik deńgeıden ekinshi rette de ótpeı qalǵan jaǵdaıda joǵarǵy oqý oryndarynda bir semestr aqyly oqı alady.

Oblystaǵy 1347 altyn belgi ıegerleriniń 1327-si UBT-ǵa qatysty. Testten bosatylǵan 20 oqýshynyń úsheýi halyqaralyq olımpıada jáne ǵylymı joba jeńimpazy bolsa, 17-si – shetelge grantpen oqýǵa túskender.

Eske sala keteıik, oblys mektepteriniń bitirýshileri respýblıka bitirýshileriniń 25 paıyzyn qurasa, ulttyq biryńǵaı testileý tapsyratyn respýblıka bitirýshileriniń 23,7 paıyzy Ońtústik Qazaqstan oblysynyń túlekteri.