Elimizde ınternet-tólqujat zańdastyrylady. Onlaın-qujat azamattardy qashyqtyqtan tirkeý jobasy aıasynda qolǵa alynǵan. Qazirgi tańda Ulttyq banktiń arnaıy toby qajetti jumystardy júrgizip jatyr. Bul týraly Qamshy.kz aqparat agenttigi  abctv.kz málimetine súıenip habarlaıdy.

Bul bastamaǵa Aqparat jáne komýnıkasıa mınıstrligi, «Zerde» holdıńi, Birinshi nesıe búrosy men iri bankter de qoldaý kórsetip otyr. Búginde jobanyń tujyrymdamasy jasalǵan. Oǵan sáıkes azamattar halyqqa qyzmet kórsetý ortalyqtarynda, Qazposhtada, bank bólimshelerinde ózderiniń málimetterin ótkize alady. Iaǵnı, daýys jazbasy, kóz qarashyǵy, saýsaq izderi, elektrondy qoltańbasy men fotosýretin tirketýi tıis. Sandyq tólqujat qazaqstandyqtarǵa kez kelgen qarjy jáne ózge de qyzmetterdi qashyqtyqtan alýyna múmkindik beredi. Júıeniń negizin halyqaralyq Morfobıometrıalyq kompanıasy jasap beredi. Ázirge júıeni engizý merzimi belgisiz.

«Internet-tólqujat kópmodaldi bıometrıalyq ónim, qyzmet. Ol adamnyń saýsaq izderi, kózderi men daýsy arqyly tulǵasyn anyqtaıdy. Osylaısha kez kelgen operasıany oryndaýǵa bolady. Sondaı-aq, tutynýshyǵa qashyqtyqtan qyzmet kórsetiledi. Bul qoǵamǵa sandyq júıeni engizýde úlken ról atqarady»,- dedi «Birinshi nesıe búrosynyń» bas dırektory Rýslan Omarov.