Prezıdent halyqqa joldaýynda "

Úshinshi keshendi mindet – eńbek naryǵyn jańǵyrtý.

Jańa tehnologıalardyń engizilýine baılanysty dástúrli salalarda eńbek resýrstary bosap qalatyn bolady. Sonymen birge, jańa ındýstrıa quryp, damytý jumyspen qamtýdyń jáne azamattardyń naqty tabysyn ósirýdiń qosymsha múmkindigi bolýǵa tıis.

Úkimet pen ákimderge eńbekkerlerdiń basqa salalarǵa basqarý aıasynda aýysýy úshin jaǵdaı jasaýdy tapsyramyn.  

Bizdiń iri kásiporyndar ákimdiktermen birlese otyryp, tıisti jol kartalaryn ázirleýi kerek. Onda qysqartylatyn jumysshylardy qaıta daıarlaý, olardy ári qaraı jumyspen qamtý úshin birlesip ınvestısıa salý jaıy qarastyrylýy qajet. Basy artyq jumys kúshi bar óńirlerden basqa jerlerge, sondaı-aq, aýyldardan qalalarǵa jumys kúshin utymdylyqpen tartýǵa qoldaý kórsetý kerek.   

Úkimet jumyspen qamtý ortalyqtaryn reformalap, barlyq bos jumys oryndary men búkil eldi mekenderde biryńǵaı onlaın platforma qalyptastyrýy qajet.", - dep, tapsyrma bergen edi.

QR Premer-Mınıstri Baqytjan Saǵyntaev Qaraǵandy oblysynda Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda Qazaqstannyń júıe qurýshy ónerkásiptik kásiporyndaryn tehnologıalyq jańǵyrtý máseleleri boıynsha jumys keńesin ótkizdi, dep habarlaıdy qamshy.kz.

«QazAtomÓnerkásip» UAK» AQ basqarma tóraǵasy Asqar Jumaǵalıev, «ERG» qadaǵalaý keńesiniń tóraǵasy Aldıar Qaztaev, «ArselorMıttal TMD» AQ bas dırektory Kalon Paramjıt, «Qazaqmys» Korporasıasy» JSHS basqarma tóraǵasy Baqtıar Qyryqpyshev, «Qazmyrysh» JSHS atqarýshy dırektory Narıman Qýanyshev, «Qazfosfat» JSHS bas dırektory Muqash Eskendirov, «Qaraǵandy keshendi qorytpalar zaýyty» JSHS bas dırektory T. Maqaev jáne «Fıtohımıa» HǴÓH» AQ basqarma tóraǵasy S. Ádekenov kásiporyndardy jańǵyrtý týraly baıandamalarymen tanystyrdy.

Qaraǵandy oblysynyń ákimi Erlan Qoshanov óńirdiń barlyq kásiporyndaryn tehnologıalyq jańǵyrtý týraly baıandady.

Keńeske memlekettik organdardyń, Qaraǵandy oblysy ákimdiginiń ókilderi, Aqtóbe, Shyǵys Qazaqstan, Mańǵystaý, Qostanaı, Jambyl, Pavlodar oblystarynyń ákimderiniń orynbasarlary, «Samuryq-Qazyna» UÁQ» AQ, «Báıterek» UBH» AQ, «QTJ» AQ, «Atameken» UKP, Qazaqstannyń júıe qurýshy kásiporyndarynyń, sondaı-aq Qaraǵandy oblysynyń ónerkásiptik kásiporyndarynyń ókilderi qatysty.

Máselelerdi talqylaý barysynda kompanıalardyń ókilderiniń suraqtaryna QR ınvestısıalar jáne damý mınıstri J. Qasymbek, QR energetıka mınıstri Q. Bozymbaev, QR ulttyq ekonomıka mınıstri T. Súleımenov, sondaı-aq QR bilim jáne ǵylym mınıstri E. Saǵadıev túsiniktemeler berip ótti.

Negizinen Reseı Federasıasynyń teńiz kólik ınfraqurylymyn Qazaqstannyń eksportshylarynyń paıdalaný múmkindigi, qosarly bilim berý júıesin jetildirý, ónerkásiptik kásiporyndar úshin qaldyqtardy kádege jaratý mólsherlemelerin ózgertý sekildi taqyryptar qozǵaldy.

Keńeste Baqytjan Saǵyntaev Úkimettiń Qazaqstannyń ónerkásiptik kásiporyndarynyń ókilderimen júıeli túrde kezdesýler men keńester ótkizip turatynyn jáne kompanıalardyń óz zaýyttarynda jańǵyrtý jumystaryn qalaı júrgizýge bolatyny týraly naqty josparlary bar ekenin atap ótýge bolatynyn aıtty.

QR Premer-Mınıstri B. Saǵyntaev ónimdilikti ulǵaıtý men taýar sapasyn jaqsartýdan bólek, jumysshylardy bosatý úderisterine de erekshe kóńil bólý qajettigin aıtty. Osyǵan oraı, ákimdikter mamandardy ekonomıkanyń ósýshi sektorlaryna keleshekte baǵyttaý úshin aldyn ala jumystar júrgizý kerek. Olardyń qatarynda servıstik qyzmetter kórsetý men qarapaıym zattar ekonomıkasyn damytý bar. Budan ózge, adamdar jańa tehnologıalar qoldanylatyn salalarǵa jumysqa ornalasqan kezde jańa daǵdylardy meńgerýi úshin qaıta oqytý jumystaryn júrgizý kerek.

Baqytjan Saǵyntaev memlekettik organdarǵa atalǵan máselelerdi baqylaýǵa alýdy tapsyrdy. Sondaı-aq, eksportqa qatysty birqatar máseleler alda ótetin Eýrazıalyq úkimetaralyq keńes otyrysy barysynda talqylanatyn bolady.