Almaty qalasynyń ákimdiginde aýys-túıister boldy, dep habarlaıdy Qamshy.kz aqparat agenttigi.

Qalalyq ákimdiktiń baspasóz qyzmetinen habarlaǵandaı, QR Kadr saıasaty jónindegi ulttyq komısıasynyń usynysy jáne  Memlekettik qyzmet isteri jáne sybaılas jemqorlyqqa qarsy is-qımyl agenttiginiń  kelisimi boıynsha Almatyda birqatar kadrlyq taǵaıyndaýlar boldy.

«Alataý aýdanynyń ákimi Baǵdat Manzorov Almaty qalasy Memlekettik sáýlet-qurylys baqylaý basqarmasynyń basshysy qyzmetine taǵaıyndaldy. Jetisý aýdanynyń ákimi Talǵat Razaqov Almaty qalasy Memlekettik eńbek ınspeksıasy jáne kóshi-qon basqarmasynyń basshysy bolyp taǵaıyndaldy.

Almaty  ákimi Baýyrjan Baıbek Memlekettik sáýlet-qurylys baqylaý basqarmasynyń jańa  basshysynyń  aldyna prınsıpti jáne júıeli isti  talap etetin birqatar mindetter qoıdy.

Iaǵnı, qalada salynyp jatqan barlyq nysandarǵa júıeli baqylaý júrgizilýi tıis. Osy jyldar ishinde kóptegen turǵyn úı keshenderiniń,  komersıalyq nysandardyń birqatary zańsyz salynǵan. Almaty ákimi qurylys júrgizýge  lısenzıa berý isin retteýdi tapsyrdy. Óıtkeni, lısenzıa alǵan keıbir jaýapkershiligi tómen  qurylysshylar sapasyz  nysan  salady, saldarynan turǵyndardan kóp shaǵymdar túsedi», - delingen habarlamada. 

Baspasóz qyzmeti taratqan málimetke sáıkes, Almaty ákimi Memlekettik eńbek ınspeksıasy jáne kóshi-qon basqarmasynyń jańa basshysy aldyna da jańa mindetter belgiledi. B.Baıbek basqarma jumysyn  túbegeıli ózgertýdi,  saraptama jasaýǵa basty nazar aýdarýdy, naqtyly máselelerdi júıeli sheshýdi tapsyrdy.

Ol jalaqy tóleýdegi qaryz máselesin naqtyly sheship, jumysty ońtaılandyrý qajet ekenin atap ótti. Eńbekaqy boıynsha  qaryz bolyp qalmaýdyń tıimdi joldaryn izdestirý kerektigin aıtty. Zeınetaqy tóleý ortalyǵymen, salyq  jónindegi memlekettik kiris departamentimen birigip jumys isteý kerektigin  naqtylady. «Qazirgi kezde Memlekettik eńbek ınspeksıasy tek  shaǵym túsken kezde qımyldaıdy, mundaı nemquraılyqqa jol berilmeýi tıis», - delingen taratylǵan habarlamada.

Almaty  ákimi  jańa basshynyń nazaryn kóleńkeli  ekonomıka máselelerin sheshýge, sonyń ishinde kóleńkeli jumys  kúshine, qurylysta qaýipsiz eńbekti qamtamasyz  etýge aýdardy. «Zeınetaqy qoryna qarjy aýdarmaı, salyq tólemeı, konvertpen jalaqy alatyndar bar  ekeni, kásiporyndarda kóptegen qaıǵyly jaıttardyń oryn alatyndyǵy jasyryn emes. Mine, osy keleńsiz jaıttardyń barlyǵyna tosqaýyl qoıylýy tıis», - dep atap ótti shahar basshysy.