Almatynyń Alataý aýdanyndaǵy Indýstrıaldy aımaqta jańa qurylystyń irgetasyn qalaý jumystary bastaldy. Endi onda japonıalyq «Tokyo Rope Manufacturing» transulttyq korporasıasy ınjenerlik júıelerdi qorǵaıtyn ekinshi joǵary tehnologıalyq zaýyt salady, dep habarlaıdy Qamshy.kz aqparat agenttigi. Bul jaıynda qalalyq ákimdiktiń baspasóz qyzmeti málimdedi.

Metaldan jasalǵan asa tózimdi temir torlar men panelder shyǵaratyn «Tokyo Rope Almaty» atty alǵashqy zaýyt ótken jyldyń qarasha aıynda Qazaqstan Respýblıkasynyń Prezıdenti Nursultan Nazarbaevtyń qatysýymen ashylǵan edi. Qala basshysy Baýyrjan Baıbek búgingi kúni Almatynyń ınovasıa tartýǵa yńǵaıly qalaǵa aınalǵanyn jetkizdi. Oǵan dálel retinde qala boıynsha ústimizdegi jyly negizgi kapıtal ınvestısıasynyń 11%-ǵa, syrtqy ınvestısıanyń 25%-ǵa artqanyn aıtty.

«Ótken jyldyń qarasha aıynda bizdiń Memleket basshysy men Japonıa Premer-Mınıstri Sındzo Abeniń kezdesýi barysynda  taraptar ekijaqty yntymaqtastyqty kúsheıtý týraly ýaǵdalasqan  bolatyn. Osyǵan oraı, Almatyda japondyq iskerlik klýby men japondyq ındýstrıaldy park ashylyp, «Tokyo Rope Almaty» jobasynyń ekinshi kezeńi júzege asa bastady. Jalpy, Almatynyń Indýstrıaldy aımaǵynda ımportty almastyratyn, eksporttyq ónimdi ulǵaıtatyn 40  joba qazirdiń ózinde qolǵa alyndy», - dedi B.Baıbek. 

«Tokyo Rope Manufacturing» dırektorlar keńesiniń tóraǵasy Shıgeto Tanakı bul Japonıadan ózge elde  balamasy joq erekshe kásiporyn ekenin jetkizdi. Indýstrıaldy aımaqtaǵy 4 gektar jerge ornalasatyn zaýytty  iske qosý úshin  sheteldik kompanıa jumsaıtyn ınvestısıa kólemi 3,6 mlrd teńgeni quraıdy. 

«Munda joǵary sapaly metal trostar, taýly jáne karerli jumystar úshin bolattan jasalyp, qorǵasynmen qaptalǵan torlar, býrosvaılyq ankeralar jáne basqa da ónimder shyǵarylady. Ónimderde qazaqstandyq mazmunnyń úlesi bolǵandyqtan ózindik quny da birshama  arzan. Óndiris kólemi boıynsha jylyna 17 myń tonna ónim shyǵarylady. Zaýytty  iske qosý 2018 jylǵa josparlanǵan», - dedi Sh. Tanaka.

«Tokyo Rope» kompanıasynyń negizi osydan 130 jyl buryn qalanǵan, bolat  arqandar shyǵarý boıynsha álemde jetekshi ról atqarady, sonymen qatar selge, daýylǵa, túrli tas kóshkinderine qarsy túratyn nysandardy salýdy jobalaýmen, montajdaýmen de aınalysady. Búgingi kúni álemdegi iri  20 kópirdiń 12-si   (Bosfor buǵazynyń,Sýes kanalynyń boıyndaǵy, Gonkongtegi  álemdegi eń uzyn  Stoýnkaters  kópirleri) japondyq metal arqandaryn paıdalanyp  salynǵan. Japonıada  shyǵatyn árbir tórtinshi  avtokólikte «Tokyo Rope» ónimderi bar.  Kompanıa jedel  lıfterge jáne ınjenerlik qorǵanysqa  qajet joǵary sapaly ónimder shyǵarýmen  de tanymal.