Búgin almatylyqtar Astana kúnin atap ótti, dep habarlaıdy Qamshy.kz aqparat agenttigi.

Almatydaǵy Respýblıka alańynda elorda kúnine oraı merekelik konsert qoıyldy. Sahnaǵa shyqqan qazaqstandyq estradanyń juldyzdary eki saǵat ishinde  óner kórsetti. Olardyń qatarynda Jámıla Serkebaeva, «GS» gıtarashylar dýeti, Zarına Omarova, Turar Raqymberlın, Janna Orynbasarovalar boldy. Almatylyqtardy «Ligtbend», «Aıýmı», «Mısterıons» toptary, sondaı-aq Zırýza, Kental jáne basqa da ónerpazdar jınalǵan qaýymdy tánti etti.

Óner juldyzdary «Astana», «Qazaqstan»,  «Astana - Almaty», «Almatyǵa kelińder», «Aınalaıyn», «Kóńil ashar», «Týǵan el», «Asyl ánim», «Bári tamasha» jáne basqa da ánderdi shyrqady.

«Byltyr Astana kúnine oraı ótkizilgen konsertke bara almap edim. Alaıda men alańǵa kelip, adamdardyń ortaq qýanyshyn, merekelik kóńil kúıdi bólisýge ázirmin. Osy merekelik konsertten keıin otbasymyzdyń ortasynda toı ári qaraı jalǵasady», - dedi Lúdmıla Naýmenko.

Sonymen qatar, bul kúni jurtty tańqaldyryp, eldiń esinde qalǵany – almatylyq aspazdardyń jasaǵan 19 metr bolatyn merekelik torty boldy.

Almatylyq aspazdar Astana kúnine arnap uzyndyǵy 19 metr bolatyn tort tartý etti. Tátti syıdyń salmaǵy – 160 keli.

Qaladaǵy ortalyq saıabaq balalardyń shyǵarmashylyq álemine aınalǵan. Búldirshinder bormen asfált ústine bas qalanyń sýretin salyp, jarysty. Túrli-tústi gúl, kún, júrek, Astananyń sımvoly – Báıterek beıneleri beıbit zamanda ómir súrip jatqan búldirshinderdiń alańsyz ómirin bildiredi. Merekede aq tilekter de aǵyldy.

Merekelik sharanyń erekshe este qalar sáti – saıabaqtaǵy demalýshylarǵa uzyndyǵy 19 metrlik tort usynylýy. Astananyń 19 jyldyǵyna arnalǵan tátti syıdyń salmaǵy 160 keli. «Merekelik tortty pisirýge 2 kún ketti», – deıdi aspazdar. Tátti taǵamnan 1000-ǵa jýyq adam dám tatty.

Eske sala ketsek, jyl saıyn elimizde Astana kúni atalyp ótedi. Búkil el aýmaǵynda bıyl 19 jyldyǵyn atap ótip jatqan elorda kúnine oraı merekelik konsertter qoıylady.