Almaty ákimi Baýyrjan Baıbek Naýryzbaı aýdanyndaǵy №36 jańa emhananyń resmı ashylýyna qatysty, dep habarlaıdy Qamshy.kz aqparat agenttigi.

Jańa medısınalyq mekeme bir ýaqytta 500 adamǵa qyzmet kórsete alady.

Densaýlyq saqtaý nysanyn «Týǵan jer» baǵdarlamasy boıynsha «Zavod Elektrokabel» JSHS kompanıasy saldy.

Jańa emhana alǵashqy medısınalyq-sanıtarlyq kómekpen qatar dıagnostıkalyq qurylǵylarmen jabdyqtalǵan.

Atap aıtqanda, tikishek qaterli isigi men asqazan aýrýlarynyń belgilerin anyqtaıtyn skrınıngtik zertteý apparattary, rentgen dıagnostıkasy jabdyqtary bar. Oftalmologıa, otorınolarıngologıa kabınetteri ashylǵan.

Kúzde múmkindigi shekteýli adamdar úshin saýyqtyrý kabıneti jumys isteıtin bolady. Emhanada elektrondi tirkeý, Call-ortalyq pen Naýryzbaı aýdanynyń turǵyndary úshin jedel medısınalyq brıgada qyzmet kórsetetin bolady.

Aıta ketý kerek, jaqynda Qalqaman yqsham eldimekeninde 200 adamǵa arnalǵan taǵy bir emdeý mekemesi, Taýsamaly aýylynda 500 adamǵa qyzmet kórsetetin emhana salynady.

Sonymen qatar qala ákimi Baýyrjan Baıbek salynyp jatqan 1200 oryndy mektep pen aýdandyq ákimdik, HQKO, AHÁT, prokýratýra, sot ornalasatyn ákimshilik keshenniń qurylys barysyn tekserdi.

Merdiger kompanıa ókilderiniń aıtýynsha, bul nysandardyń barlyǵy osy aıdyń aıaǵyna taman daıyn bolmaq. Qazirgi kezde munda ishki árleý men abattandyrý jumystary júrip jatyr.

Bıyl Naýryzbaı aýdanynda uzyndyǵy 107,5 shaqyrym bolatyn sý jáne 81,2 shaqyrym bolatyn sý aıyrý júıesi, Taýsamaly, Taýjoly, Shuǵyla, Tastybulaq, Akjar, Quramys, Qarǵaly, Jaılaý Aqsaı, Qarǵaly eldi mekenderin ortalyqtandyrylǵan taza sýmen qamtamasyz etetin ári sý tazalaıtyn Aqsaı jáne Qarǵaly sý stansalary salynyp jatyr. Uzyndyǵy 24,4 shaqyrym bolatyn káriz kolektoryn salý josparlanǵan.

Aýdannyń jol jelisinde de qyzý jumystar júrip jatyr.

Abaı dańǵylyn Qalqaman eldimekeniniń Áýezov kóshesinen qala shekarasyna deıin jetkizý, Jandosov kóshesin Saın kóshesinen Taýsamaly aýylyna deıin jańartý, Qalqaman jáne Alty alash eldi mekenderinde 30 kósheni jóndeý, 33 jol salý bastalyp ketti.

Qarǵaly ózeniniń arnasyna uzyndyǵy 7,7 shaqyrym beton konstrýksıa tóselgen soń, onyń aınalasy abattandyrylady. Jasyl jelek, gúlzarlar otyrǵyzylady. Shaǵyn arhıtektýralyq formalar qoıylyp, balalardyń oıyn alańdary jasalady, jaıaý júrginshi joly salynyp, jaryq kózderi ornatylady.