Almaty áýejaıynda birinshi ushý-qoný joly kúrdeli jóndeýden ótkizilip jatyr. Jańa nysannyń sapasy IKAO standarty boıynsha 3V sanatyna deıin jetkizilmek, dep habarlaıdy Qamshy.kz aqparat agenttigi.

QazAqparat tilshisiniń arnaıy saýalyna «Almaty halyqaralyq áýejaıy» jedel basqarý boıynsha atqarýshy dırektory Abdrasılov Baqythan jaýap berdi.

Onyń aıtýynsha, sapaly ushý-qoný jolaǵyn jasaýǵa 6 mlrd teńge ketedi.

«Almaty áýejaıyndaǵy birinshi ushý-qoný jolyn kúrdeli jóndeýden ótkizý kásiporynnyń basty maqsattarynyń biri bolyp otyr. Oǵan 6 mlrd teńge jumsalady. Osynyń arqasynda áýejaıdyń birinshi jolaǵy saǵatyna 27 ushaqty ushyryp-qondyra alatyn bolady. Buǵan deıin tek 13 ushaqqa qyzmet kórsetý múmkin bolatyn. Kúrdeli jóndeý 1 qarashaǵa deıin jalǵasady», - dedi Baqythan Abdrasılov.

Jańa nysan zamanaýı jaryq dabylymen, radıotehnıkalyq quraldarmen jabdyqtalady. 75 metr qashyqtyq kórinetin tuman kezinde de ushaqtardy qıyndyqsyz qabyldaıtyn bolady.

Mamannyń aıtýynsha, jóndeý jumystary ushaqtardyń kestesine yqpal ete qoımaıdy.

«Áýejaı basshylyǵy osy máseleni eskerdi. Ushaqtardyń jaz-kóktemgi qozǵalysynyń kestesi osy jóndeý jumystaryn eskere otyryp jasaldy. Birinshi ushý-qoný joly ár beısenbi saıyn 4 saǵatqa 10:40-tan 14:40-qa deıin jabyq bolady. Bul óz kezeginde reısterdiń kestesine eleýli áser etpeıdi», - dedi ol.

Aıta ketý kerek, sondaı-aq, ekinshi ushý-qoný jolaǵy da profılaktıkalyq jóndeýden ótkiziledi.