Almaty ákimi Baýyrjan Baıbek jaıaý júrginshilerge kóbirek oryn berilgen qala kóshelerin qaıta jasaý jumystarynyń barysyn tekserdi, dep habarlaıdy Qamshy.kz aqparat agenttigi.

Baýyrjan Baıbek jumys barysynda jaıaý júrginshilerge kóbirek oryn berilgen Panfılov, Jibek joly, Gogol, Qabanbaı batyr kósheleri men «Astana» alańynyń qaıta jasalýyn tekserdi. Ákim merdiger uıymdarǵa jumystyń sapasy men belgilengen merzimde aıaqtalýyn tapsyrdy. 

Jıynda qazirgi kezde jylý júıelerin aýystyrý jumystarynyń aıaqtalǵany jáne aryq lotoktarynyń tóselgeni, kóshe jaryǵy jelileriniń tartylyp, qurǵaq sýburqaqtarynyń iske qosylǵany aıtyldy. Kelesi aptadan bastap, joǵaryda atalǵan kóshelerde biryńǵaı arhıtektýralyq stıl qalyptastyrý úshin nysandardyń syrtqy betterin jańartý jumystary bastalady.

Burynnan bar jasyl jelekter sol boıy saqtalady. Kóleńke kóbeıtý maqsatynda eńseli aǵashtar, qaıyń, emen otyrǵyzý qarastyrylǵan.

Qalalyq ákimdiktiń baspasóz qyzmeti taratqan málimetke súıensek, qalada 330 myń sharshy metr jerge jasyl jelek otyrǵyzylady. Jibek joly kóshesin Qonaev kóshesinen Jeltoqsan kóshesine deıin qaıta jasaý barysynda «Arbat» burynǵy kelbetin saqtaıdy, tolyq abattandyrylady jáne jeke fýnksıonaldy aımaqtarǵa bólinedi. Demalys oryndary artady, burynnan bar fontandar qaıta jasalady, sport jáne balalar alańdary paıda bolyp, kespe tastyń ornyna joǵary sapaly granıt tóseledi.

Panfılov kóshesi boıymen Qabanbaı batyr kóshesinen bastap, Jibek jolyna deıingi aralyqtaǵy jaıaý júrginshi jolyna da granıt tóseledi, munda da demalatyn oryndar, sport jáne balalar alańdary, abattandyrylǵan velojoldar bolady.

Atap óterlik jaıt, jóndeý jumystary bastalǵan kezde kóne qalanyń eski kespe tastary tabylǵan edi, jobanyń jalpy kompozısıasynda olar da paıdaǵa asady. 

«Astana» alańynda kólik qozǵalysy jolaǵy qysqarady, bosaǵan keńistikterge qosymsha aǵashtar otyrǵyzylady, eki sýburqaq paıda bolady. Osylaısha, jaıaý júrginshiler men kólik legi ekige bólinedi, avtoturaq aımaǵy shekteledi. Alańnyń soltústik bóligine  ekologıalyq taza granıt tastar tóseledi. 

«Qabanbaı batyr men Gogol kóshelerinde qozǵalys bóligin shekteý qarastyrylmaǵan, biraq jaıaý júrginshi jolynyń túgel boıyna kólik qoıýǵa tyıym salynady, avtomobıldi tek arnaıy jabdyqtalǵan  oryndarda ǵana qaldyrýǵa bolady», delingen qalalyq ákimdik taratqan habarlamada.