Qazaqstanda tólengen aıyppuldar málimetter bazasynan avtomatty túrde óshetin bolady, dep habarlaıdy Qamshy.kz aqparat agenttigi. Bul jaıynda QR Bas prokýratýrasy Quqyqtyq statısıka jáne arnaıy esepke alý jónindegi komıtetiniń tóraǵasy Baǵdat Mýsın málimdedi.

«Elimizde ákimshilik aıyppuldardy durys esepke alý máselesinde úlken problema bar. Túrli arnalar arqyly qazirdiń ózinde menimen júzge jýyq adam bazalarda qosarlanǵan málimetterdiń bar ekendigin aıtyp, baılanysqa shyqty. Buǵan qosa, tólem jasalǵanymen, aıyppuldyń bazada áli turǵandyǵyna qatysty shaǵym da kóp. Biz, prokýror retinde basqa da faktilerdi anyqtaımyz. Máselen, tulǵalarǵa jazylǵan hattamalar málimetter bazasyna der ýaqytynda engizilmeıdi nemese qatemen engiziledi ne bolmasa joǵalyp ketedi... Sondyqtan barlyq ákimshilik jazalardyń úlgilik bazasy bolýy tıis ákimshilik quqyq buzýshylyqtardyń biryńǵaı tizilimin qurý týraly sheshim qabyldadyq», – dep jazdy Baǵdat Mýsın Feısbýktegi paraqshasynda.

Baǵdat Mýsınniń málimedemesine sáıkes, eger tólem bank bólimshesi arqyly kez kelgen jaǵdaıda nemese basqa jerde jasalatyn bolsa, onda tólemniń jasalǵandyǵy týraly aqparat birden úlgilik bazaǵa túsip, azamattan avtomatty túrde alynatyn bolady.

«Ákimshilik quqyq buzýshylyqtardyń biryńǵaı tiziliminiń birinshi kezeńi – bul jol polısıa qyzmetkerleriniń hattama jazýyn avtomattandyrý prosesi. Problemany júıeli túrde sheshetindigimizge senimdimin. Biraq, bul jumys bolashaqta problemany joıýǵa baǵyttalǵan. Al bul problemalardyń barlyǵy qazirgi ýaqytta basyna tónip otyrǵandar ne isteý kerek? Baıaǵyda tólengen aıyppuldary bazada tursa jáne sol úshin tólem jasaý talap etilip otyrsa ne isteý qajet? Maǵan júgingenderdiń problemasyn sheshe kele, mundaı máselelerdiń 90 paıyzy mamandandyrylǵan halyqqa qyzmet kórsetý ortalyqtarynda týyndaıtyndyǵyn túsindim. Sondyqtan da, endigi ýaqytta árbir mamandandyrylǵan halyqqa qyzmet kórsetý ortalyǵynda turaqty túrde Quqyqtyq statısıka jáne arnaıy esepke alý komıtetinen ákimshilik aıyppuldar jónindegi ókiletti prokýrordyń bolatyndyǵy týraly sheshim qabyldandy. Bul qazirgi ýaqytta másele týyndap jatatyndarǵa kómek beredi dep oılaımyn. Al ákimshilik quqyq buzýshylyqtardyń biryńǵaı tizilimi boıynsha júıeli jumystardy jalǵastyratyn bolamyz», – dedi Baǵdat Mýsın.