Batystyń Reseıge qarsy sanksıalarynyń Qazaqstanǵa eshqandaı da qatysy joq. Degenmen, memleket kez kelgen jaǵdaıǵa daıyn, –dep málimdedi Ulttyq ekonomıka mınıstri Tımýr Súleımenov, dep habarlaıdy Qamshy.kz aqparat agenttigi Tengrinews.kz saıtyna silteme jasaı otyryp.

«Kez kelgen jaǵdaıǵa daıyn bolý qajet, alaıda biz asyra siltegimiz kelmeıdi. Mınıstrlik tarapy Ulttyq bank pen Qarjy mınıstrligin qosa aıtar bolsaq, biz barlyǵyna da daıynbyz. Sonymen qatar, bul oqıǵany qandaı da bir oqys oqıǵa deı almaımyz. Bizdiń oıymyzsha, bul jaǵdaıǵa qalypty túrde qaraý kerek. Mysaly, munaı nemese metal baǵasynyń kóterilýi nemese quldyraýy, seriktes memleketimizdiń ekonomıkasynyń damýy nemese qurdymǵa ketýi degen sıaqty oqıǵalar qalaı áser etse, bul jaǵdaı da dál solaı áser etedi. Eldegi ahýaldy kúrt ózgertip jibererlikteı oqys oqıǵa kórip turǵanym joq», – dep málimdedi mınıstr.

Sonymen qatar, Tımýr Súleımenovtyń aıtýynsha, uzaq merzimdi sanksıalar Reseıdiń ekonomıkasyn edáýir áser eteri anyq jáne de EAEQ quryltaıshysy retinde Qazaqstannyń da ekonomıkasyna áser etýi múmkin.

«Qubyrǵa qatysty suraq kóterilgen bolatyn. Muhıttarmen, ásirese, Novorossıısk teńizderimen bizdiń munaıymyzdy jalǵap otyrǵan qubyrlar sanksıada tirkelmegen. KTK ınvestorlary bolyp tabylatyn Chevron sekildi amerıkalyq iri kompanıalar ózderiniń tranzıtti qubyrlary sanksıaǵa tirkelmeýin jiti qadaǵalap, oǵan jol bermegen. Iaǵnı, bul turǵyda bizdiń jergilikti naryqtarǵa munaı jetkizýimizde eshqandaı da keri áseri bolmaıdy», – dep aıtyp ótti.

Esterińizge sala ketsek, Elbasy Nursultan Nazarbaev Reseıge qarsy Batys sanksıalarynyń Qazaqstanǵa tıgizer áseri jóninde aıtyp ótken bolatyn.

«Jaqsy nátıje kórsetý úshin biz jyldyń sońyna deıin uıymshyldyq tanytyp, qarqyndy jumys isteýimiz kerek. Birshama qaýiptiń bar ekeni ras. Bizdiń energetıkalyq jáne shıkizat ónimderi biraz shyǵynǵa ushyraýy múmkin. Reseıge qarsy Batys sanksıalarynyń Qazaqstanǵa da áser etýi ábden múmkin. Muny da esten shyǵarmaǵan jón», – dep premer-mınıstr Saǵyntaevpen kezdesý barysynda Nursultan Nazarbaev atap ótti.