Ál-Farabı atyndaǵy QazUÝ-dyń Stýdentter qurylys jasaǵy (SQJ) Elbasy N.Nazarbaevtyń «Bolashaqqa baǵdar rýhanı jańǵyrý» atty maqalasyn talqylady. Tarıh ǵylymynyń kandıdaty, dosent, Qazaqstan tarıh kafedrasy meńgerýshisiniń orynbasary Edil Noıanuly maqaladaǵy negizgi basymdyqtarǵa baǵdar jasap, jaı-japsaryn jastarǵa túsindirip berdi, dep habarlaıdy Qamshy.kz aqparat agenttigi QazUÝ baspasóz qyzmetine silteme jasap.

Shara barysynda búgingi kúnniń basty qajettiligi bolyp tabylatyn bilim jaıy sóz bolyp, rýhanı jańǵyrýdyń negizgi joldarynyń biri − dúnıetanymdy keńeıtýdiń mańyzdylyǵy eskerildi.

Edil Noıanuly pragmatızmniń ózektiligine toqtalyp, Elbasy maqalasyndaǵy «Naqty maqsatqa jetýge, bilim alýǵa, salamatty ómir saltyn ustanýǵa, kásibı turǵydan jetilýge basymdyq bere otyryp, osy jolda ár nárseni utymdy paıdalaný – minez-qulyqtyń pragmatızmi degen osy», - degen joldardy aıryqsha atap ótti. Maqaladaǵy súbeli oılarǵa negiz jasaı otyryp ol jıyndy mardymdy áńgimege ulastyrdy.

Óz kezeginde jasaqtaǵy stýdentter de maqala jaıynda oılaryn ortaǵa saldy. Mehanıka-matematıka fakúltetiniń 3-kýrs stýdenti Asqat Asanbaev «Elbasy aıtqandaı, tabysty bolýdyń eń irgeli, basty faktory bilim ekenin árkim tereń túsinýi kerek. Jas­tary­myz basymdyq beretin mejelerdiń qatar­ynda bilim árdaıym birinshi orynda turýy shart. Osy oraıda balalardy mektep qabyrǵasynan bilim nárimen sýsyndatyp, rýhanı tálim berýdiń mańyzy zor dep bilemin», - deıdi. Onyń pikirinshe, bul jemqorlyqtyń aldyn alýdyń basty tásili.

Jınalǵan stýdentter maqalanyń qazaq elin jarqyn bolashaqqa jetelerine nyq senimdi. Olardyń aıtýynsha, maqalany talqylaı kele odan ári alǵa umtylyp, jigerlene túsken. Jıynda kerek aqparat pen kópten kókeıinde júrgen saýaldaryna jaýap alyp, keńinen áńgime-dúken qura alǵandaryna qýanyshty. Tańnyń atysynan kúnniń batysyna deıin eńbek etetin SQJ-lyqtar úshin maǵynasy mol rýhanı kesh bolǵanyn aıtady.