Qyrkúıek aıynda Grýzıa eli Qazaqstanǵa qaryzyn qaıtara bastaıdy. Bul jaıynda Qazaqstannyń Grýzıadaǵy tótenshe jáne ókiletti elshisi Ermuhamet Ertisbaev málimdedi, dep  Qamshy.kz aqparat agenttigi Tengrinews.kz saıtyna silteme jasap habarlaıdy.

«Qyrkúıek aıynyń basynda Grýzıa Qazaqstanǵa memlekettik qaryzyn tóleýin bastaıdy. Biz kezinde, osydan shamamen 20 jyl buryn grýzınderge 27,5 mıllıon dollar qarajat qaryzǵa bergen bolatynbyz. Ol 90-jyldarda bolǵan. Ol kezde bizdiń ózimizdiń memlekettik qazynamyz bosap turǵan bolatyn, alaıda Grýzıa eli bul qarjyny qatty qajet etken», – dedi Ermuhamet Ertisbaev QR SİM brıfıńinde.

«Men 2013 jyldyń kókteminde Grýzıa eline barǵanymda, dostyqtyń aty dostyq, alaıda qaryzdy qaıtarý qajettigin aıtqanmyn. Bul máseleni qalaı da bolsyn sheshý qajet. Túrli kelissózder júrgizildi. Olar Parıjdik klýb júıesi boıynsha qaryzdaryn óteıtin bolady, bul júıede paıyzdar óte tómen», – deıdi elshi.