Qytaı bıligi AQSH-ty óziniń táýelsizdigine qol suqty dep aıyptady dep habarlaıdy RIA Novostı-ge silteme berip Qamshy.kz aqparat agenttigi. Amerıkandyq eskadralyq mınatasýshy Djon S. Makkeın Ońtústik-Qytaı teńizindegi Spratlı daýly aralyna jaqyndaǵan.

QHR-dyń Syrtqy ister mınıstrligi amerıkandyq áskerı kemeniń Spratlı araly mańynan ótkeni týraly beısenbi kúni habarlaǵan. Qytaı dıplomattary amerıkandyqtardyń bul isti Qytaı táýelsizdigine dóreki qol suǵýshylyq dep baǵalady.

Sonymen birge Qytaıdyń Qorǵanys mınıstrligi amerıkandyqtardyń mundaı áreketi eki jaqtyń strategıalyq senimdiligine nuqsan keltiretinin atap ótti.

Aıta keteıik,  Ońtústik-Qytaı teńizi – álemdegi shıelenisti oshaqtardyń biri. Bul aýmaqqa ıelik etýge birden 6 memleket talasady: QHR, Fılıppın, Malaızıa, Brýneı, Vetnam, Taıvan.