Astanada QR premer-mınıstri Baqytjan Saǵyntaevtyń qatysýymen Eýrazıalyq úkimetaralyq keńestiń «keńeıtilgen» quramdaǵy otyrysy ótti, onyń qorytyndysy boıynsha birqatar kópjaqty qujattarǵa qol qoıyldy dep habarlaıdy Qamshy.kz aqparat agenttigi.

Otyrysta Qazaqstan Respýblıkasynyń Premer-Mınıstri B.Saǵyntaev, Qyrǵyz Respýblıkasynyń Premer-Mınıstri S.Jeenbekov, Armenıa Respýblıkasynyń Premer-Mınıstri K.Karapetán, Belarýs Respýblıkasynyń Premer-Mınıstri A.Kobákov, Reseı Federasıasy Úkimetiniń Tóraǵasy D.Medvedev, Eýrazıalyq ekonomıkalyq komısıa Alqasynyń Tóraǵasy T.Sarkısán sóz sóıledi.

Óz sózinde Baqytjan Saǵyntaev EýrazEQ aıasynda, sondaı-aq úshinshi eldermen saýdadaǵy taýar aınalymy ósiminiń oń qarqyn bergenin atap ótti. Jumystyń belgilengen qarqyny Eýrazıalyq ekonomıkalyq odaqtyń jumys jasaýymen baılanysty asa ózekti máselelerdi qaraýǵa jáne olarǵa jedel áreket etýge múmkindik beredi.

Sonymen qatar, odan ári damytý úshin EýrazEQ ishki naryǵynda kedergisiz orta qurý boıynsha jumystar jalǵasady. EÚAK-ge múshe elder 60-tan astam kedergilerdi joıý boıynsha jol kartalaryn ázirleý jumystaryn júrgizýde.

Budan ózge, qazaqstandyq tarap kótergen máselelerdiń ishinde ortaq qarjy naryǵyn qalyptastyrý tujyrymdamasynyń jobasyn talqylaý, keme qatynasy týraly, úshinshi eldermen ózara saýdadaǵy tehnıkalyq kedergilerdi joıý tártibi men sharttary týraly kelisimsharttardy qabyldaý, sondaı-aq eńbek resýrstarynyń ortaq naryǵyn qurý máseleleri boldy.

Oǵan qosa, ónerkásip salalaryn odan ári damytý, agroónerkásip kesheni jáne ǵylymı ázirlemelerdi komersıalaý salalaryn odan ári damytý máseleleri qaraldy. Sondaı-aq, eksporttaýshynyń EýrazEQ-qa múshe memleketterdiń qaısysyna jatatynyna qaramastan, teńiz porttaryna shyǵýǵa teń quqyqty qamtamasyz etý qajettigi týraly usynys jasaldy.

EÚAK otyrysynda birqatar kópjaqty qujattarǵa, olardyń ishinde kelesilerge qol qoıyldy:

Úkimetaralyq keńestiń ókimderi: «2016 jyly EýrazEQ-qa múshe memleketterdiń búdjetteriniń arasynda kedendik ákelim bajdarynyń somasyn esepteý jáne bólý týraly», «EýrazEQ ortaq elektr energetıkalyq naryǵy aıasynda ortalyqtandyrylǵan saýdany uıymdastyrý úshin saýda alańdaryn paıdalanýdyń jáne EýrazEQ ortaq elektr energetıkalyq naryǵyn qalyptastyrý boıynsha is-sharalardy qarjylandyrýdyń keıbir máseleleri týraly», «Eýrazıalyq úkimetaralyq keńestiń kezekti otyrysyn ótkizý ýaqyty jáne orny týraly».

Úkimetaralyq keńestiń tapsyrmalary: «Eýrazıalyq ekonomıkalyq odaqtyń sıfrlyq kún tártibin iske asyrýdyń negizgi baǵyttaryn daıyndaý boıynsha jumys barysy týraly», «Eýrazıalyq ekonomıkalyq odaqqa múshe memleketterdiń eńbekshilerin zeınetaqymen qamtamasyz etý týraly kelisimshart jobasy boıynsha jumys barysy týraly», Joǵarǵy Eýrazıalyq ekonomıkalyq odaqtyń «Qazaqstan Respýblıkasynyń Dúnıejúzilik saýda uıymyna qosylýyna baılanysty keıbir máseleler týraly» 2015 j. 16 qazandaǵy №22 sheshiminiń 4-tarmaǵyna sáıkes qalyptastyrylǵan táýekel beıimderi qoldanylatyn taýarlardy kedendik deklarasıalaý praktıkasyna júrgizilgen monıtorıń týraly esepterdi usyný týraly» jáne «2017 jylǵy 11 sáýirdegi Eýrazıalyq ekonomıkalyq odaqtyń Keden kodeksi týraly Kelisimshartynyń kúshine enýine qajetti memleketshilik rásimderdi ótkizý týraly».