Fıdjı Respýblıkasy 2030 jylǵa qaraı kómirtek qaldyqtarynyń kólemin 30%-ǵa qysqartýdy kózdeıdi. Bul týraly Fıdjı Respýblıkasynyń Premer-mınıstri Djosaıa Voreke Baınımarama EKSPO-2017 Halyqaralyq mamandandyrylǵan kórmesi aıasynda Fıdjı Respýblıkasynyń Ulttyq kúnin merekeleý barysynda atap ótti, dep habarlaıdy Qamshy.kz aqparat agenttigi EKSPO-2017 kórmesiniń medıa-ortalyǵyna silteme jasap.
«Biz 2030 jylǵa qaraı jeke kómirtek qaldyqtaryn 30%-ǵa qysqartý jónindegi Parıj kelisimi aıasynda qabyldanǵan dúnıejúzilik qaýymdastyq aldynda mindettemeni oryndaý úshin sý, jel jáne kún energıasy men bıotynǵa kóshý qajettiligin túsinemiz. Sonymen qatar, Fıdjı Respýblıkasy memlekettiń jáne álem bolashaǵy úshin mańyzdy bolyp tabylatyn jańartylatyn energıa kózderine ınvestısıalar tartýǵa múddeli. Qazirgi kezde qazba otynyn ımporttaýǵa jylyna mıllıard dollarǵa jýyq qarajat jumsaýdamyz», - dedi Djosaıa Voreke Baınımarama.
Óz kezeginde QR Syrtqy ister mınıstri Qaırat Ábdirahmanov Astana qalasyndaǵy Halyqaralyq mamandandyrylǵan kórmesin ótkizýde qoldaý kórsetken elderge qazaq eliniń alǵys bildiretindigin tilge tıek etti. Mınıstrdiń aıtýynsha, Fıdjı Respýblıkasy Qazaqstannyń senimdi seriktesteriniń biri.
«Fıdjı Respýblıkasy halyqaralyq saıası arenada Qazaqstannyń senimdi seriktesi ekendigin atap ótkim keledi. Osy qarym-qatynastardy joǵary baǵalaımyz jáne olardy eki eldiń ıgiligi úshin nyǵaıtýǵa nıet bildiremiz. Kórmege Fıdjı Respýblıkasynyń qatysýy eki eldiń ulttyq salt-distúrlerin tanyp bilýge múmkindik beredi», - dedi Qaırat Ábdirahmanov.
Aıta keteıik, Fıdjı Respýblıkasynyń pavılony Tynyq muhıty plazasynda ornalasqan. Pavılonda eldiń mádenıeti, týrızm, saýda salalaryndaǵy jáne ınvestısıalyq múmkindikteri usynylǵan. Fıdjı Respýblıkasynyń pavılonyn kórmeniń eki aı jumysy aralyǵynda 90 000 astam adam tamashalaǵan.
