Almaty oblysynda "Koksu water fest-2017" atty raftıngten dástúrli saıys ótti. Tylsym tabıǵatymen erekshe kózge túsetin Qoıandy saıynda Kóksý ózenimen ótetin 15 shaqyrymdyq marafonǵa memlekettik qyzmetkerler, BAQ ókilderi, energetıkter, dızaınerler, "Jasyl el" eńbek jasaǵy barlyǵy 15 komanda qatysty, - dep habarlaıdy Qamshy.kz aqparat agenttigi Tengrinews.kz saıtyna silteme jasap.
Úshinshi jyl qatarynan uıymdastyrylǵan sý festıvaliniń basty maqsaty jer jannaty Jetisýdyń ásem tabıǵatyn tamashalý, óńirde týrızmniń damýyna oń yqpal etý. Sondaı-aq, ekstrımaldy sport túrlerin nasıhattap, buqarany salaýatty ómir saltyn qalyptastyrýǵa shaqyrý.
Sharaǵa usynys bildirgender tym kóp boldy. Ásirese, jastar jaǵy bul sharanyń qyzyqty ári áserli ótýi úshin bar kúsh-jigerin saldy. Kóksý sý festıvalinde raft sý kóligine otyryp alǵash eskek ustaǵandar da osy arada kezdesti.
Aǵysy qatty taý ózeniniń tolqyndarymen arpalysyp, tamasha áser alǵan sporttyń bul túrine kóńili aýǵanyn kópshilik jasyrmady. Alǵan áserlerin bir-birimen bólisti. Qaǵazbastylyq pen keńsedegi jumystan bir sát jeńildegen memlekettik qyzmetkerler ózen aǵynymen jarysyp, bir serpilip qalǵanyn aıtty. Jarys barysynda qatysýshylar tek raftpen júzip qana qoımaı, kedergilerden ótip, kelisilgen ýaqyt ishinde arqanmen taýǵa kóterilip qaıta tústi.
Osy ýaqytqa deıin mundaı jarysqa qatysyp kórgen joqpyn. Jarystan alǵan áserdi sózben aıtyp jetkizý múmkin emes. Tek baryp, qatysyp, seziný kerek. Bul sharanyń nátıjesinde jańa dostar taptyq. Ózimizdi sýdaǵy jarysta synap kórdik. Men eskek esýshi boldym. Jaýapkershilik maǵan artylǵandyqtan, qolymnan kelgenshe jaqsy nátıje kórsetýge tyrystym. Ásirese, aǵysy qatty jerden ótkende qaıyqtan birazymyz qulap ta qaldy. Biraq bizge keńes beretin arnaıy toptyń mamandary bizdiń qaýipsizdigimizdi basty nazarǵa alyp, bizge baǵyt-baǵdar berip otyrdy. Osy jaǵynan uıymdastyrýshylardyń zor eńbegine alǵys aıta ketken jón. Jarystyń sharty bárimizge ortaq bolǵandyqtan, komanda quramy belsene eńbek etti. Aldaǵy ýaqytta mundaı shara uıymdastyrylsa mindetti túrde qalmaı baramyz, – deıdi raftıng jarysyna alǵash qatysqan oblystyq «Jetisý» gazetiniń betteýshi-dızaıneri Aıdos Muzdybaev.
Uıymdastyrýshylar jarysqa qatysýshylar úshin barlyq jaǵdaıdy jasaǵan. Tipti, ystyq tamaqqa deıin tegin qamtamasyz etilgen.
"Bul sharanyń jyl ótken saıyn ótkizý aýqymy, tártibi, sharty keńeıip keledi. Qatysýǵa nıet bildirýshiler de tym kóp. Biz barlyq salany qamtýǵa tyrystyq. Bolashaqta bul jarysty basqasha uıymdastyramyz degen jospar da bar. Biz kóbine jumysbastylyqpen júrip, tabıǵattyń keremet tustaryn tamashalaı almaımyz. Ásirese, memlekettik qyzmetkerler. Jer jannaty jetisýdyń tumsa tabıǵaty tym bólek. Ol sulýlyqty sýretten kórgennen góri kózben kórý áseri basqa. Sol úshin de biz osy sharany uıymdastyrdyq. Munda qaýipsizdik sharalary qatań saqtalǵan. Jarysqa qatysýshylardyń barlyǵyna arnaıy kıim berildi. Shara sońynda qatysýshylar óz rızashylyqtaryn aıtyp, keler jarysty uıymdastyrýǵa degen ózderiniń pikirlerimen bólisti", - deıdi Almaty oblystyq týrızm basqarmasy basshysynyń mindetin atqarýshy Arqaý Shyntaev.
Saıys qortyndysy boıynsha Almaty oblysy ákiminiń apparaty birinshi oryndy ıelense, buqaralyq aqparat quraldary ókilderinen quralǵan komanda ekinshi orynǵa turaqtady. Al úshinshi oryn "TATEK" energetıkalyq kompanıa ókilderiniń enshisine buıyrdy. Oblystyq týrızm basqarmasy uıytqy bolǵan shara kelesi jyly da óz jalǵasyn tabady.
