Ótken aptada Shýchınsk-Býrabaı kýrorttyq aımaǵynyń aýmaǵynda Rixos Borovoe oteli «Asyl mıras» qaıyrymdylyq qorymen birlesip, Aqmola ákimdiginiń qoldaýymen «Charity Tour de Burabay» V merekelik qaıyrymdylyq velojarysyn ótkizdi dep habarlaıdy Qamshy.kz aqparat agenttigi Aqmola oblysy İshki saıasat basqarmasynyń Óńirlik komýnıkasıalar qyzmetine silteme jasap.

Bul jobanyń maqsaty – balalar aýrýhanalaryna qazirgi zamanǵy medısınalyq jabdyqtar satyp alý jáne aýyr syrqatqa shaldyqqan balalarǵa kómek kórsetý úshin aqsha qarajatyn jınaý bolyp tabylady.

2013 jyldan bastaý alǵan mereıtoıly velosherýge bıyl 1500-den asa adam jınalyp, 718 qatysýshy Shýche-Býrabaı aýmaǵyndaǵy 30 shaqyrymǵa sozylǵan joldy velosıpedpen eńserip ótti. İs-sharada velojarystan bólek, qaıyrymdylyq aýksıon jáne balalar sýretiniń jármeńkesi ótti. Jalpy, korporatıvtik jáne jeke jarnalar, mesenattardyń janashyrlyq járdemi, aýksıondar men jármeńkeler esebinen túsken bul qaıyrymdylyq qarjy Qazaqstannyń balalarǵa arnalǵan medısınalyq jáne tárbıe berýshi mekemelerin jabdyqtaýǵa baǵyttalady.

Jyl saıynǵy qaıyrymdylyq velosherýi Aqmola oblysy ákimdiginiń qoldaýymen Rixos Borovoe qonaq úıi «Asyl mıras» qorymen birlese ótkiziledi. Uıymdastyrýshylar velosherý qatysýshylarynyń sany jyldan jylǵa artyp kele jatqanyn atap ótýde.

İs-sharanyń ashylýynda QR Mádenıet jáne sport mınıstri Arystanbek Muhamedıuly quttyqtaý sózin sóıledi. «Charity Tour de Burabay Qazaqstanda velosıped sportyn damytýǵa jáne dáripteýge jaǵdaı jasap qana qoımaı, sonymen birge, em men ońaltýǵa muqtaj balalarǵa erekshe kóńil bólip otyrǵanymyzdy baıqatady», – dep atap ótti mınıstr.

Charity Tour de Burabay ıdeıasyna bastama bergen bıznesmen, mesenat jáne «Asyl mıras» qaıyrymdylyq qorynyń negizin salýshy Bolat Ótemuratov velosherýdi ary qaraı da ótkizýge nıetti ekenin jetkizdi. Ol aldaǵy jyldary is-sharanyń aýqymy keńeıip, kóptegen balalar kómekke qol jetkizetinine úmit bildirdi.

Qalyptasqan dástúr boıynsha peletondy «Astana Pro Team» komandasynyń bas menedjeri Aleksandr Vınokýrov bastap shyqty. Velosherý bastalar aldynda olımpıada chempıony ári QR-nyń eńbek sińirgen sport sheberi bylaı dep atap ótti: «Charity Tour de Burabay Qazaqstannyń sporttyq jáne qaıyrymdylyq is-sharalar kúntizbesinde mańyzdy orynǵa ıe bolyp otyr. Komandanyń atynan jáne ózimniń atymnan uıymdastyrýshylardyń barlyǵyna, izgi bastamanyń júzege asýyna qolǵabys etkenderge alǵysymdy bildiremin. Bul is-sharany biz jylda úlken qýanyshpen qoldap otyramyz».

Velosherýge Aleksandr Vınokýrovtan bólek, Qazaqstandyq ziltemirshi, olımpıada oıyndarynyń eki dúrkin chempıony, álemniń tórt dúrkin chempıony, Qazaqstannyń eńbek sińirgen sport sheberi Ilá Ilın, boksshy, olımpıada chempıony, bokstan Qazaqstannyń eńbek sińirgen sport sheberi Serik Sápıev te qatysty.

Sonymen qatar, Qazaqstandyq áýesqoı-boksshy, 2016 jylǵy Brazılıadaǵy Olımpıada oıyndarynyń chempıony Danıar Eleýsinov, Reseı jáne Qazaqstan tenısshisi Galına Voskoboeva jáne «Astana Pro Team» komandasynyń múshesi Iakob Fýlsang syndy sportshylarymyz da boı kórsetti.

Qaıyrymdylyq velosherýi aıasynda aýksıon ótkizilgenin aıta ketý kerek. Ony velosherýdiń naǵyz basty is-sharasy deýge bolady. Shara uıymdastyrýshylary bıyl jınalǵan búkil qarjyny Petropavl qalasyndaǵy oblystyq balalar aýrýhanasyna, Taldyqorǵan qalasyndaǵy oblystyq perınataldyq ortalyqqa, Oral qalasyndaǵy balalarǵa arnalǵan oblystyq kópbeıindi aýrýhanaǵa, Aqtóbe qalasyndaǵy balalarǵa arnalǵan klınıkalyq aýrýhanaǵa, Oral qalasyndaǵy batys qazaqstandyq múgedek balalardyń «Báıterek» oblystyq qoǵamdyq birlestigine arnap medısınalyq jabdyqtar satyp alýdy josparlap otyr.

Bıylǵy jylǵy jınalǵan qarjy sommasy 160 mln teńgege jetken. Bes jyl ishinde jınalǵan qarjy sommasy 14 esege artyp, 463,5 mln teńgeni quraǵan. Al qatysýshylardyń sany 7 eseden astamǵa ósken. 2017 jyly aýksıonnan 102,9 mln teńge, balalardyń sýretter jármeńkesinen 684 myń teńge jınaldy. Jeke jáne korporatıvtik jarnalar 30,4 mln teńgeden asyp, mesenattardyń janashyrlyq járdemi 26 mln teńgege jetken.

Jyl saıyn ótkiziletin Charity Tour de Burabay velosherýi salaýatty ómir saltyn nasıhattap qana qoımaı, qazaqstandyqtardyń qaıyrymdylyq iske belsendi qatysýyna jaǵdaı jasaıdy ári ishki týrızmniń damýyna úlken úlesin qosýda.