Aǵymdaǵy jylǵy 20-21 tamyz kúnderi Irkýtsk qalasynda (Reseı Federasıasy) Qazaqstan Respýblıkasy jáne Reseı Federasıasy İshki ister mınıstrlikteriniń Birlesken alqasynyń úshinshi otyrysy ótti dep habarlaıdy Qamshy.kz aqparat agenttigi İshki ister mınıstrliginiń baspasóz qyzmetine silteme jasaı otyryp.
Alqa otyrysyna Qazaqstan Respýblıkasynyń İshki ister mınıstri Q. Qasymov, Reseı Federasıasynyń İshki ister mınıstri V.Kolokolsev, sondaı-aq eki el mınıstrleriniń orynbasarlary, QR İİM jáne RF İİM ortalyq apparattarynyń basshylary, TMD-daǵy Uıymdasqan qylmysqa jáne qylmystyń ózge de qaýipti túrlerine qarsy kúresti úılestirý jónindegi búrosynyń (BKBOP SNG) dırektory, osy búroǵa Qazaqstan Respýblıkasynan taǵaıyndalǵan ókil, sondaı-aq jekelegen óńirlerdiń İİD basshylary qatysty.
Jıynda mınıstrler Birlesken alqanyń ekinshi otyrysynda (Óskemen q. 2016 j) qabyldaǵan sheshimderdiń sátimen júzege asyrylyp jatqanyn, sonyń ishinde shekaralyq yntymaqtastyq aıtarlyqtaı arta túskenin atap ótti.
Kezdesý barysynda Qazaqstan men Reseı İshki ister organdarynyń zańsyz esirtki aınalymyna qarsy kúres salasyndaǵy ekijaqty yntymaqtastyǵy jan-jaqty qarastyryldy. Osy másele boıynsha Qazaqstan men Reseıdiń shekeralas óńirlerinde, dálirek aıtqandaı Kaspıı teńizi aýmaǵynda jedel aldyn alý operasıalaryn ótkizý týraly sheshim qabyldandy.
Buǵan qosa, taraptar zańsyz kóshi-qonǵa qarsy is-qımyl salasyndaǵy yntymaqtastyǵyn uıymdastyrý, ulttyq zańnamalardaǵy ózgerister týraly málemetterdi jedel almasý jáne osy baǵyttaǵy tıimdi jumys tájirıbesimen bólisýdi jandandyrý máseleleri boıynsha pikir almasty.
Otyrystyń qorytyndysynda delegasıa basshylary zańsyz esirtki aınalymyna qarsy kúreste vedomstvoaralyq yntymaqtastyqty jetildirý, sondaı-aq zańsyz kóshi-qonǵa qarsy is-qımyl salasyndaǵy ekijaqty yntymaqtastyqty uıymdastyrýǵa qatysty sheshimderge qol qoıyp, sonymen birge Birlesken alqanyń 2018 jylǵy Jumys josparyn bekitti.
Qazaqstan Respýblıkasy men Reseı Federasıasy İshki ister mınıstrlikteriniń Birlesken alqasynyń kelesi otyrysy Qazaqstanda ótkiziletin boldy.
