Aımaq basshysy Danıal Ahmetov jańa orynbasaryn tanystyrdy. Bul qyzmetke osyǵan deıin QR Prezıdenti Ákimshiliginiń memlekettik baqylaý jáne aýmaqty-uıymdastyrý jumysy bóliminde memlekettik ınspektor qyzmetin atqarǵan Shalqar Baıbekov taǵaıyndaldy, dep habarlaıdy Qamshy.kz aqparat agenttigi SHQO ákimdiginiń baspasóz qyzmetine silteme jasap.

Shalqar Baıbekov 1967 jyly 6 aqpanda burynǵy Semeı oblysy, Abaı aýdanynda dúnıege kelgen. 1996 jyly Qazaqstan memlekettik basqarý akademıasynyń «Ekonomıka» mamandyǵy boıynsha bilim alyp, 2001 jyly Qazaqstan memlekettik zań akademıasynyń «Zańger» mamandyǵy boıynsha támamdaıdy.

Qyzmet jolyn 1988 jyly Semeı oblysy memlekettik saqtandyrý ınspeksıasynyń Jańasemeı aýdany aǵa ınspektory laýazymynan bastaǵan.

1990 jyldyń shilde aıynan bastap Semeı salyq ınspeksıasy salasynda qyzmet etti. 1999 jyldan bastap Pavlodar, keıin Astana, Qaraǵandy Salyq komıtetteriniń tóraǵasy bolady.

2008-2014 jyldar aralyǵynda Astana qalasy Salyq Departamentiniń Esil aýdany boıynsha salyq basqarmasy basshysy qyzmetin atqarady.

SHQO ákimi Danıal Ahmetov jańa orynbasaryn tanystyra otyryp, Shalqar Baıbekov agrarlyq sektordy damytýdaǵy mańyzdy suraqtardy sheshýde óz tájirıbesin tıimdi paıdalanady degen senimin bildirdi.