AQTAÝ. 17 mamyr. BNews.kz   -  Búgin Aqtaýda Jańaózen qalasy ÝUI burynǵy bastyǵy Jeńisbek Temirovke qatysty qylmystyq is boıynsha úkim oqyldy, dep habarlaıdyBNews.kz tilshisi.

Sot ÝUI burynǵy bastyǵyn 5 jylǵa bas bostandyǵynan aıyrdy, ol jazasyn jalpy rejımdegi kolonıada óteıtin bolady. Sonymen qatar, Temirovke 5 jyl ishinde polıseı qyzmetin atqarýǵa tyıym salynǵan. Jeńisbek Temirov sotqa deıin úıqamaqta boldy. Úkim oqylǵannan keıin ony kúzetshiler tutqynǵa aldy. Úıqamaqta bolǵan ýaqyt jalpy merzimdi óteý kezinde esepke alynady. Eske sala keteıik, Jańaózen qalasy ÝUI burynǵy bastyǵy Jańaózendegi tártipsizdikter kúni tutqyndalǵan Bazarbaı Kenjebaevty ÝUI-de zańsyz ustap, ýaqytyly aýrýhanaǵa jetkizýdi qamtamasyz etpegeni úshin aıyptalǵan edi. Memlekettik aıyptaýshy Jańaózen qalasy ÝUI burynǵy bastyǵy Jeńisbek Temirovti 7 jylǵa bas bostandyǵynan aıyrýdy surady.

Derekkóz: bnews.kz