Astana qalasyndaǵy «Saryarqa» velotreginde Qanat Islam - Brendon Kýk jekpe-jegi aıasyndaǵy boks keshi aıaqtalyp keledi, dep jazady Qamshy.kz.
Boks keshiniń anderkartynda sońǵy bolyp Janqosh Turarovqa qarsy Brýno Leonardo Romeı qazaqy shapanmen shyqty. Onyń qarsylasy argentınalyq Brýno Leonardo Romeı kásipqoı boks sharshy alańynda 25 kezdesý ótkizip, 21 kezdesýinde jeńiske jetken. Janqosh Turarov bolsa kásipqoı rıngte 21 kezdesý ótkizip, barlyǵynda jeńiske jetken. 15 kezdesýinde otandasymyz qarsylasyn nokaýtqa túsirgen. Janqosh Turarov pen Brýno Leonardo Romeı arasyndaǵy kezdesý 10 raýndqa sozyldy. Qos boksshy da alǵash ret 10 raýndqa deıin bokstasty.
Keıinirek suhbat bergen Janqosh Turarovtyń 6-ynshy raýndta qolyn syndyryp alǵany belgili boldy.
Aıta keteıik, jartylaı orta salmaqta judyryqtasatyn Janqosh Turarov WBA reıtıńinde 10-shy satyda.
Eske salsaq, 26 jastaǵy jerlesimiz Janqosh Turarov 2 apta buryn Qamshy.kz aqparat agenttigine suhbat bergen bolatyn. Onda «Qarsylasym myqty. Biraq el namysy úshin esemdi jibermeımin!» degen ol, «Allaǵa shúkir deımin, 21 kezdesý ótkizip, bárin jeńispen aıaqtadym. Jeńisterimniń eshqandaı syry joq. Túbinde mańdaı terim aqqan qanshama eńbek, qıyndyq jatyr. Psıhologıalyq, moraldyq turǵyda óz-ózińdi shyńdap, daıyndap, jattyǵyp, qıyndyqtardyń bárin ótkerip júrgen jaıymyz bar. Sonyń bárin Allanyń ózi kórip, bizge jeńis syılap jatqan bolar.
Meni bıikke, jeńiske jeteleıtin – áke-sheshem, ájem, jubaıym, baýyrlarym. Solarǵa qarap ómirge degen qulshynysym odan saıyn arta túsedi. Meni jeńiske jeteleıtin – osy kisiler», - degen edi óziniń jeńisteriniń syrymen bólisip.
Aıta ketetin bolsaq, keshtiń alǵashqy jekpe-jegin Meıirim Nursultanov pen brazılıalyq Ismael Býeno bastap, kásipqoı rıngte 3 jekpe-jek ótkizip, ekeýin jeńispen aıaqtaǵan jerlesimiz alǵashqy sekýndtarda-aq, qarsylasyn tyqsyryp tastady.
Ekinshi bolyp sharshy alańǵa kótergen Dımash Nıazov Edýardo Pereıra dos Reıshpen qolǵap túıistirip, qarsylasyn tóreshilerdiń bergen baǵasy boıynsha 2:1 upaı sanymen jeńdi.
Úshinshi bolyp sharshy alańǵa Aıdos Erbosynuly men Argentınalyq qarsylasy shyǵa sala qýalap júrip sabady.
10 raýndtan turatyn tórtinshi jekpe-jekke 20 boksynda 18 jeńisiniń 7-sin nokaýt jasaǵan amerıkalyq Tomas Djastın Berıl men qandasymyz Álı Ahmedov shyqty. Álı Ahmedov 8 raýndta qarsylasyn 2 ret qulatyp, jeńiske jetti.
Qanat Islammen birge bir aı daıyndalǵan Nursultan Jańabaev shyǵa sala Aleks Sandro Dýarteni uryp qulatty. Nursultan Jańabaev alǵashqy kezdesýinde-aq WBA chempıondyq beldikteriniń birin ıelengen.
Altynshy jekpe-jekte Rýslan Myrsataev pen Andres Matıas Affranıl shyǵyp, qarsylasy Rýslannyń soqqysyna shydaımaı 4 raýndta soqqyǵa shydamaı sereıip qulady.
Sharshy alańnyń jetinshi juby 2013 jylǵy álem chempıony, Rıo olımpıadasynyń qatysýshysy Jánibek Álimhanuly men Jılberto Pereıra dos Santos ta jerlesimizdiń paıdasyna sheshildi.
Boks keshin «Qazaqstan» jáne «Qazsport» telearnalary tikeleı efırde kórsetti.
