«EXPO-2017 ASTANA» kórmesi aıasynda Astana qalasynda Qanat Islam men Brendon Kýk arasyndaǵy jekpe-jek máresine jetti, dep jazady Qamshy.kz. Otandasymyz birinshi orta salmaqtaǵy WBO, NABO jáne WBA Inter-Continental beldikterin qorǵady.
Qanat Islam ádettegideı sharshy alańǵa «Qamshy.kz» aqparat agenttigi jetekshisi Bilál Qýanyshtyń áni, «Qamshynyń» gımni «Dúr Qamshy» ánimen shyqty.
Úshinshi raýndtyń sońǵy sekýndynda Qanattyń sátti bir soqqysynan Brendon eseńgirep-aq qaldy. Al, jankúıer jurttyń qyzý qoldaýy Astana aspanyn sharlap ketti. Tórtinshi raýndta da Qanat jıi shabýyldady. Degenmen Brendon esin jıyp aldy. Al, besinshi raýnd bastala sala Qanattyń sol jaq qolymen soqqan soqqysy qarsylasynyń ıek astynan tıip, kerme arqanǵa shalqala qulatty. Eki nokdaýn alsa da Brendon tózimdiligin dáleldedi.
Segizinshi raýndta Brendon úshinshi ret nokdaýn aldy. Qanat Islam soqqysyn údetkenimen qarsylasy qushaqtap alyp, raýnd aıaqtaldy. Toǵyzynshy raýnd bastala sala soqqysyn údetken Qanatqa tóreshi daýsyz jeńisti syılady.
«Qazaq» laqap atymen shyǵyp júrgen jerlesimiz Qanat Islam birinshi orta salmaqtaǵy WBO, NABO jáne WBA Inter-Continental chempıondyq belbeýleriniń ıegeri Búkilálemdik boks qaýymdastyǵynyń (WBA) 8 qyrkúıekte jańartylǵan reıtıńinde ekinshi orynda.
Al, Qanat Islamnyń kezdesýdegi qarsylasy jankúıerlerine Bad Boy, ıaǵnı "jaman bala" atymen tanymal. Brendon Kýk bolsa WBA reıtıńinde - 5 orynda ornalasqan. Kanadalyq boksshynyń promoýteri Taıler Bakston atap ótkendeı, Brendon jeńisten úmitti boldy, rıngke «kimmen, qaıda shyqsa da» judyryqtasýǵa daıyn ekenin aıtqan.
13 qyrkúıek kúni 33 jasqa tolatyn qandasymyz Qanat Islam kásipqoı boksqa 2012 jyly aýysyp, sol ýaqyttan beri eshkimge des bergen joq. Ol ózi ótkizgen 24 kezdesýdiń barlyǵynda jeńiske jetti. 20 ret qarsylasyn nokaýtqa túsirdi.
Onyń sońǵy jekpe-jegi Norberto Gonsalespen mamyr aıynda AQSH-tyń Florıda shtatyndaǵy Boka Raton qalasynda ornalasqan «Boca raton resort & club»-ta kezdesýi. Maıtalmandar WBO NABO jáne WBA Inter-Continental vakantty tıtýly úshin talasty. Qanattyń 24-inshi kezdesýi ótken keshte Janqosh Turarov 21-inshi jeńisine jetti.
Jerlesizmiz Qazaq jerinde osymen ekinshi ret jekpe-jek ótkizip otyr. Jerlesimiz 22-inshi kezdesýin Almatyda ótkizgen bolatyn. 2016 jyldyń aıtýly oqıǵalarynyń biri retinde este qalǵan, 29 qazan «Almaty arenada» ótken básekede Qanat Islam qarsylasy Patrık Aloteıdi upaı sanymen jeńdi. Ótken jyldyń eń mańyzdy sporttyq oqıǵasynda Qanattan bólek, Janqosh Turarov ta básekelesi Aısak Arıeni (Gana) 4 raýndta jaıratyp salǵan edi.
Árbir jekpe-jegin jastar asyǵa kútetin Qanat Islamnyń bıylǵy alǵashqy jekpe-jegi ári 23-kezdesýi aqpan aıynda Amerıkanyń Delaver shtaty Ýılmıngton qalasynda brazılıalyq boksshy Robson Assıspen jekpe-jek jasaǵan bolatyn. Oıyn bastala sala jerlesimiz qarsylasyn bir mınýtqa jetpes ýaqytta-aq nokaýtqa jibergen edi.
Óziniń ashyq jattyǵýy aıasynda Qanat Islam tilshilerge bergen suhbatynda «Bizdiń jattyǵý lagerimiz keremet boldy. Óz-ózime senimdimin jáne jeńiske jetýge daıynmyn. Alda bolatyn jekpe-jekti taǵatsyzdana kútip júrmin. Bul – meniń úıim jáne men jeńemin», – degen edi.
Jekpe-jekiń anderkartynda qazaqstandyq 8 boksshy sharshy alańǵa shyqty.
Keshtiń alǵashqy jekpe-jegin Meıirim Nursultanov pen brazılıalyq Ismael Býeno bastap, kásipqoı rıngte 3 jekpe-jek ótkizip, ekeýin jeńispen aıaqtaǵan jerlesimiz alǵashqy sekýndtarda-aq, qarsylasyn tyqsyryp tastady.
Ekinshi bolyp sharshy alańǵa kótergen Dımash Nıazov Edýardo Pereıra dos Reıshpen qolǵap túıistirip, qarsylasyn tóreshilerdiń bergen baǵasy boıynsha 2:1 upaı sanymen jeńdi.
Úshinshi bolyp sharshy alańǵa Aıdos Erbosynuly men Argentınalyq qarsylasy shyǵa sala qýalap júrip sabady.
10 raýndtan turatyn tórtinshi jekpe-jekke 20 boksynda 18 jeńisiniń 7-sin nokaýt jasaǵan amerıkalyq Tomas Djastın Berıl men qandasymyz Álı Ahmedov shyqty. Álı Ahmedov 8 raýndta qarsylasyn 2 ret qulatyp, jeńiske jetti.
Qanat Islammen birge bir aı daıyndalǵan Nursultan Jańabaev shyǵa sala Aleks Sandro Dýarteni uryp qulatty. Nursultan Jańabaev alǵashqy kezdesýinde-aq WBA chempıondyq beldikteriniń birin ıelengen.
Altynshy jekpe-jekte Rýslan Myrsataev pen Andres Matıas Affranıl shyǵyp, qarsylasy Rýslannyń soqqysyna shydaımaı 4 raýndta soqqyǵa shydamaı sereıip qulady.
Sharshy alańnyń jetinshi juby 2013 jylǵy álem chempıony, Rıo olımpıadasynyń qatysýshysy Jánibek Álimhanuly men Jılberto Pereıra dos Santos ta jerlesimizdiń paıdasyna sheshildi.
Sońǵy bolyp shyqqan Janqosh Turarov alǵash ret 10 raýnd boıy bokstasyp qarsylasyn upaı sanymen jeńdi.
Keıinirek suhbat bergen Janqosh Turarovtyń 6-ynshy raýndta qolyn syndyryp alǵany belgili boldy.
Boks keshin «Qazaqstan» jáne «Qazsport» telearnalary tikeleı efırde kórsetti.
Anons bere ketsek, Qyrkúıek aıynda búgingi kúnnen bólek qazaqstandyq jankúıerlerdi 16 qyrkúıektegi Golovkın men Alvares arasyndaǵy taǵy bir jekpe-jek kútip tur. Búgin ekinshi ret áke atanǵan 35 jastaǵy Golovkın aldaǵy jekpe-jeginde WBC, WBA (Super), IBF jáne IBO tıtýldaryn qorǵaıdy.
AQSH-tyń Las-Vegas qalasyndaǵy 20 myń oryndyq T-Mobile arenasynda 16 qyrkúıek kúni ótetin boks jyldyń basty oqıǵasy bolmaq. Jekpe-jek Astana ýaqytymen 17 qyrkúıek, ıaǵnı jeksenbiniń tańynda ótedi. Golovkın – Alvares boks keshin translásıalaýǵa quqyq alǵan Qazaqstan men QazSport telearnalary tikeleı efırde kórsetedi. Sondaı-aq, Atalǵan boks 130 elde kórsetiledi.
