«Rýhanı jańǵyrý» baǵdarlamasy aıasynda júzege asyrylyp jatyrǵan sharalar nátıjelerin berýde. Baǵdarlama aıasynda qazaq rýhanıaty men mádenıetiniń odan ári qaryshtap damýyna úles qosatyn, tyń jobalar men iri sharalar uıymdastyrylýda.

Sonyń biri 2017 jyldyń 14 qyrkúıeginde Oral qalasynda ótpek. Batys Qazaqstan oblystyq «Oral óńiri» jáne «Prıýrale» gazetteriniń                               100 jyldyǵyna arnalǵan mereıtoılyq sharalar oblys basshylyǵy,                           QR Aqparat jáne komýnıkasıalar mınıstrliginiń  ókili, respýblıkalyq jáne oblystyq baspa basylymdarynyń bas redaktorlarynyń qatysýymen uıymdastyrylady.

Aldymen elimizdiń qalalary men óńirlerinen baspasóz salasyn zertteýge súbeli úlesin qosyp júrgen ǵalymdardyń qatysýymen dóńgelek ústel otyrysy ótedi dep josparlanýda.

Basqosý barysynda baspasóz tarıhyn zertteý máseleleri talqylanyp, arnaıy ashylǵan «1911kz» saıtynyń tanystyrylymy, sonymen qatar, gazetterdiń alǵashqy jyldary latyn qaripimen basylǵan jınaǵynyń kórmesi ótedi.

Tústen keıin Batys Qazaqstan oblystyq qazaq drama teatrynda oblystyq gazetterdiń 100 jyldyǵyna arnalǵan saltanatty shara bolady. 
Shara barysynda qazaqtyń kórnekti aqyny Qaırat Jumaǵalıevtiń 80 jáne oblystyq gazetterdiń 100 jyldyǵyna arnalǵan «Naryn qumyn ańsaǵan Qaırat aqyn» atty respýblıkalyq jyr músháırasynyń, gazetterdiń ǵasyrlyq mereıtoıyna oraı magıstranttar men stýdentter arasynda jarıalanǵan kýrstyq jumystar baıqaýynyń qorytyndylary shyǵarylyp, júldegerler marapattaldy.  

ANYQTAMA ÚSHİN: 

Oblystyq gazet 1918-1919 jyldary «Habar-Izvestıa», 1919 jyly «Durystyq joly», 1920 jyly «Sahara tańy», 1920-1930 jyldary «Qyzyl tý», 1931-1957 jyldary «Ekpindi qurylys», 1958-1964 jyldary «Oktábr týy», al 1964 jyldan «Oral óńiri» degen atpen basylyp keledi. 
«Jaıyq Pres» JSHS oblystyq gazetterdiń osy bir ǵasyrlyq shejiresin jınaqtap, zertteýdi maqsat etken bolatyn. «Qazaqstan» men «Uran» óz aldyna, «Habar-Izvestıa», «Kırgızskaıa pravda» - «Qazaq durystyǵy», «Durystyq joly», «Ushqyn» (respýblıkalyq «Egemen Qazaqstan» gazetiniń bastaýy) gazetteri de jınaqtalyp, kitap bolyp jaryqqa shyqty. 
Sondaı-aq el táýelsizdiginiń 25 jyldyǵyna oraı 1991 jylǵy 16 jeltoqsannan bastap 2016 jylǵa deıingi, ıaǵnı shırek ǵasyrdy qamtıtyn óńirdiń hronologıalyq shejiresi de jasalyp, eki tilde basylyp shyqty. 
Sońǵy bes jyl ishinde oblystaǵy baspasóz tarıhyna baılanysty on kitap jaryq kórgen eken, bul az tabys emes. Bıyl «Qyzyl tý» gazetindegi tańdaýly maqalalar iriktelip, jeke kitap retinde daıyndaldy. 
Oǵan qosa ár jerde jatqan gazetterdiń 100 jyldyq tigindileri jınaqtalyp, elektrondy nusqalary jasaldy. Qazirgi kezde arnaıy bólme jasaqtalyp, júz jyldyq tigindi qoıyldy. Sonyń ishinde latyn qarpimen shyqqan gazet tigindileri de bar. Elektrondy nusqalardyń jasalýy Qazaqstan Prezıdentiniń «Sıfrly Qazaqstan» jobasymen tolyq úndesedi.