Demokratıalyq kúshterdiń "Qazaqstan-2050" jalpyulttyq koalısıasynyń otyrysynda "Nur Otan" partıasy Tóraǵasynyń Birinshi orynbasary Muhtar Qul-Muhammed latynǵa kóshý ultymyzǵa qatysty úsh birdeı máseleniń oń sheshilýine septigin tıgizetinin aıtty dep habarlaıdy Qamshy.kz aqparat agenttigi.
"Latynǵa kóshý arqyly biz ultymyzdyń álemdik básekege qabilettiligin arttyratyn úsh máseleni sheshemiz. Birinshiden, aǵylshyn alfavıtiniń negizindegi jańa qarip júıesi jastarymyzdyń da jasamystarymyzdyń da aǵylshyn tilin meńgerýin jeńildetedi. Ekinshiden, aǵylshyn alfavıti men tilin úırený arqyly ǵylym-bilimniń osy tilde jasalǵan mol qazynasyn erkin ıgerýge jol ashady. Úshinshiden, jer júzine tarydaı shashylǵan bar qazaqtyń basyn qosady", – dedi Muhtar Qul-Muhammed.
Sondaı-aq, otyrysta "Aq jol", Qazaqstannyń komýnıstik halyqtyq partıasy, "Aýyl" jáne "Birlik" saıası partıalarynyń jetekshileri sóz alyp, latyn álipbıine kóshýdi qoldaıtyndaryn jetkizdi. İs-sharaǵa qatysqan belgili ǵalymdar men til mamandary da Elbasy bastamasynyń el bolashaǵy úshin mańyzy zor ekenine erekshe nazar aýdardy. Nátıjesinde demokratıalyq kúshterdiń "Qazaqstan-2050" jalpyulttyq koalısıasynyń Qazaqstan halqyna arnaǵan Úndeýi jarıalandy.
