Qazaqstan Respýblıkasy Ulttyq ulanynda 2017 jylǵy oqý jylynan bastap jańa joba, jańa patrıottyq is-shara qolǵa alynyp otyr. Sharanyń aty - «Elbasy sabaqtary» dep atalady, dep habarlaıdy Qamshy.kz aqparat agenttigi QR Ulttyq ulany «Ońtústik» óńirlik qolbasshylyǵynyń baspasóz qyzmetine silteme jasaı otyryp.
Atalǵan sabaqtar quqyqtyq tártip áskerleriniń respýblıkadaǵy barlyq qurylymdyq áskerı bólimderinde ótkiziletin bolady. Áskerge rýh berýshi tárbıeshi ofıserler Otan kúzetinde júrgen jaýyngerlerge, jalpy áskerı ujymnyń ár múshesine Qazaqstan Respýblıkasynyń Tuńǵysh Prezıdenti, Elbasy Nursultan Ábishuly Nazarbaevtyń salıqaly saıasatynyń arqasynda táýelsizdik jyldary elimizdiń jetken barsha jetistikteri jaıly keń turǵyda túsindirip, tárbıe saǵaty retinde jetkiziletin bolady.
Elbasy sabaqtary ár túrli taqyryptardy qamtyǵan. Máselen, «Elbasynyń Otan jaıly aıtqandary», «Elbasynyń halyqtar dostyǵy men birligi jaıly ulaǵattary», «Elbasynyń otbasy jaıly aıtqandary», «Elbasynyń el tarıhy jaıly aıtqandary», «Elbasynyń ulttyq qaýipsizdik jaıly baılamdary» jáne taǵy basqa Prezıdentimizdiń asa ózekti tolǵam-oılary jaýyngerlik ujym músheleriniń rýhyn kóterý men shyńdaýǵa jolbasshy tárbıe ózegi retinde alynyp otyr.
Jalpy alǵanda, tárbıelik-tanymdyq sabaqtardyń basty maqsaty – Otan qorǵaýshylardy eldi súıýge, halyqqa, Elbasyna qaltqysyz qyzmet etýge tárbıeleý, áskerı qyzmetshilerdiń qoǵamdyq-azamattyq ómirge belsendi aralasýyna septesý, tulǵalar boıynda sheshendik ónerdi damytý bolyp tabylady.
Eń birinshi sabaq 2017 jyly 13 qyrkúıekte Ulttyq ulannyń «Ońtústik» óńirlik qolbasshylyǵynda tárbıeshi ofıserlermen jáne áskerı qoǵamdyq uıymdardyń ókilderimen ótkizilgen jıyn aıasynda Almaty qalasynda ótti. Shymyldyq ashar sabaqty taqyryby: «Elbasynyń til týraly jáne ulttyq kod jaıly aıtqandary» jaıly boldy. Sabaq barysynda qazaq tiliniń latyn álipbıine aýysý máseleleri, elimizdegi úshtildilik saıasaty men qazaq tiliniń ulttyq kody men qazaq halqynyń mádenıetin saqtaýdaǵy aıryqsha róli talqylandy. Sondaı-aq, shara barysynda Elbasynyń memlekettik til jáne shet tilder jaıly aıtqan oı-tolǵamdary basylǵan beıne-aýdıo jazbalar tyńdarman nazaryna usynyldy.
Sabaqty ótkizgen «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Esentaıuly Súleımenov: «Elbasy halqymyzdyń arqa súıer alyp tulǵasy, taý tuǵyry. Nursultan Ábishuly Nazarbaevtyń osy ýaqytqa deıingi atqaryp jatqan tolaǵaı isterine barshamyz kýágermiz. Halqyn sheksiz súıip, eliniń bir qajetine jarasam dep tynym tappaı júrgen óz ultynyń asyl perzenti, Elbasymyzdyń arqasynda shırek ǵasyr ýaqytynyń ishinde elimiz jarqyn damý jolynan ótti. Kezinde arman bolǵan ıgi isterimiz júzege asyp otyr. Qazaq halqy ózge eldermen terezesi teń, keregesi keń turǵyda damyp, órkendep keledi. Bul eldiń mańdaıyna bitken baq. Elbasynyń osy ýaqytqa deıin aıtyp kele jatqan oı-tolǵamdary úlken tárbıelik mánge ıe. Ózderińiz biletindeı, Tuńǵysh Prezıdentimiz alýan taqyryptarda ár jıyn, keńesterde, óziniń jazǵan kitaptarynda, maqalalarynda úlken keleli oılar, elimizdi jarqyn bolashaqqa bastar baǵdarlardy kórsetip keledi. Máselen, til, shekara, ulttyq qaýipsizdik, ıadrolyq qarýlanýdyń adamzatqa qateri, ultaralyq dostyq, Otan, týǵan jer, ult, taǵy da kóptegen taqyryptarda aıtqan oılary jeke azamatty da, álde ujymdardy da tárbıeleýge paıdalanylar tunyp turǵan qaınar kóz. Qysqasha qaıyryp aıtqanda, tárbıeniń qaınary. Mine, biz osyny eskerip, endigi kezekte Elbasynyń sózderin dáıekke ala otyryp, jeke quramdy tárbıelemekpiz. Elbasynyń aıtqan ár taqyryptaǵy oılary bir, bir saǵat bolyp jiktelip, mamandarymyzben muraǵattan alynǵan beınejazbalarymen dáıektelip, jeke quramǵa usynylatyn bolady», - dep atap ótti.
