Qazaqstan Respýblıkasynyń Prezıdenti Nursultan Nazarbaev sıfrlandyrý máseleleri jónindegi respýblıkalyq keńeske qatysty, dep habarlaıdy Qamshy.kz aqparat agenttigi.
Elbasy is-shara aldynda arnaıy ázirlengen kórmeni aralap kórdi. Onda túrli baǵyttar boıynsha 30-dan astam İT-jobalar qoıylǵan.
Keńeske memlekettik organdardyń, ulttyq kompanıalardyń jetekshileri, Parlament depýtattary, sheteldik iri kásiporyndar men kompanıalardyń ókilderi qatysty.
Basqosýda Premer-Mınıstr Baqytjan Saǵyntaev, aqparattyq-kommýnıkasıalyq tehnologıalar jáne ınovasıalar salasyndaǵy sarapshylar baıandama jasady.
Memleket basshysy «Sıfrlyq Qazaqstan» memlekettik baǵdarlamasyn tanystyrý barysynda aıtylǵan málimetterdi eskerip, elimizdiń ekonomıkasyn damytý úshin sıfrlyq tehnologıalardy qarqyndy engizýdiń mańyzdylyǵyn atap ótti.
– Biz táýelsizdik jyldary ishinde álemniń básekege qabiletti 50 eliniń qataryna qosyldyq. Qazir ozyq damyǵan 30 eldiń qataryna ený mindeti tur. Ol Qazaqstannan jańa ınovasıalyq damýdy jáne jedel tehnologıalyq jańǵyrýdy talap etedi. Sondyqtan men osy jyldyń basynda Qazaqstan halqyna arnaǵan joldaýymda Úshinshi jańǵyrý jóninde jarıaladym. Onyń negizi sıfrlandyrý bolyp tabylady, – dedi Qazaqstan Prezıdenti.
Elbasy sıfrlandyrý kásiporyndar men jalpy elimizdiń básekege qabilettigin, sondaı-aq halyqtyń ómir súrý sapasyn arttyrý úshin qajet ekenin aıtty.
Memleket basshysy ókiletti organdar men kásiporyndar tarapynan erekshe mán berýdi qajet etetin sıfrlandyrýdyń jekelegen baǵyttaryna toqtaldy.
– Memlekettiń, jeke kásiporyndar men uıymdardyń ózara is-qımylyn jolǵa qoıý mańyzdy. Bızneske sıfrlyq tehnologıalardy keń aýqymda engizýi úshin jaǵdaı jasaý kerek, – dedi Qazaqstan Prezıdenti.
Sonymen qatar, Elbasy biliktiligi joǵary mamandardy daıarlaýdyń mańyzdylyǵyna toqtalyp, bilim berý salasyndaǵy saıasatty qaıta qaraý qajettigin atap ótti.
Budan bólek, Memleket basshysy ǵylymı-zertteý ınstıtýttary men joǵary oqý oryndarynyń bazasynda, sondaı-aq ınovasıalyq klasterler aıasynda quzyrettilik ortalyqtaryn damytý máselelerine nazar aýdardy.
Qazaqstan Prezıdenti İT-startaptar halyqaralyq tehnoparkiniń jańa tehnologıalardy ázirleý men olardy engizý máselesinde basty ról atqaratynyn aıtty.
– Elimizdiń qarjy sektory ozyq tehnologıalardy meılinshe sezinetin sala bolǵandyqtan, sıfrlandyrýǵa qatysty sheshimderdi keńinen qoldana bastady. Ol aldaǵy ýaqytta da osy úderistiń basynda bolýy kerek. «Astana» halyqaralyq qarjy ortalyǵynyń aldynda jańa qarjylyq tehnologıalar men quraldardy damytý mindeti tur, – dedi Elbasy.
Nursultan Nazarbaev belgilengen mindetterdi sheship, ǵylymı zertteýler men ázirlemelerdi yntalandyrý úshin normatıvtik quqyqtyq bazany jetildirýdi tapsyrdy.
Sońynda Memleket basshysy bolashaqtaǵy jahandyq syn-tegeýrinder men tehnologıalyq trendterdi zertteý qajettigin atap ótti.
– Búgin aıtylǵan máselelerdiń barlyǵy elimizdiń Úshinshi jańǵyrýy aıasyndaǵy mańyzdy mindetter sanalady. Úkimet olardy memlekettik baǵdarlamada eskerýi qajet. Sondaı-aq, ortaq máselelerdi sheshý úshin Eýrazıalyq ekonomıkalyq komısıa aıasynda arnaýly komısıa qurý kerek. Sonymen qatar, baǵdarlamany jetildire túsý úshin Prezıdent janynan komısıa qurýdy tapsyramyn, – dep túıindedi Qazaqstan Prezıdenti.
