Mahabbat... Sondaı ystyq sóz. Bul uǵymnyń aýqymy da keń. Ata-anaǵa degen mahabbat, Otanǵa degen, týǵan jerge degen mahabbat, dosqa degen mahabbat, basqa da taýsylmaıtyn sezimder... Alaıda aıtqanda júregiń jylyp sala beretin, kóńiliń erekshe kúıge enetin súıikti adamyńa degen mahabbattyń orny tipten erekshe. Kitap oqyp, telehıkaıa qarap mahabbat degen sózben bala kúnimizde-aq tanystyq. Mán berip, tereń oılanyp, túsine almasaq ta, áıteýir qyz ben jigittiń qol ustasyp birge júrgeni, oınaǵany, kúlgeni, birneshe ýaqyttan soń úılenip, otbasy atanǵandary – bári-bári qyzyq bolyp kórinetin. Sol kúnderi qyz ben jigittiń qarym-qatynasy degen dúnıege qyzyǵýshylyq tanyta bastadym. Jo-joq ózim jigitpen aralasyp, sezimge berildim degen sóz emes... 15-16 jastaǵy besikten beli shyqpaǵan kishkentaı ǵana qyzbyn ǵoı. Ol jyldary 15-16 jastaǵy qyzdar ájepteýir kishkentaı qyz sanalatyn, búgingi kúndegideı emes.
Maǵan qyzyǵy – ǵashyq juptardyń ómiri, bir-birine degen sezimderi, mahabbattary. Mundaı sezimder jaıynda kimnen suraımyn. Árıne, óz týystarymnan, ápkelerimnen, jeńgelerimnen. Ápke-jeńgelermen syrlasqanǵa ne jetsin, shirkin. Aǵalarymyzǵa «mahabbat» degen sózdi aıtýǵa qorqatyn edik qoı. Bir ápkemnen suradym:
-Jezdemdi alǵash qalaı unattyńyz?
-Biz stýdent bolǵanda kesh (vecher) degen jıi bolatyn. Oı, naǵyz qyzyqty shaqtar bizdiń kezde boldy ǵoı. Terezelerdi gazettermen qymtap, jaryqty sóndirip, mýzykanyń daýsyn qattyraq shyǵaryp, váls bıleıtinbiz. Ózimizdiń kimmen bılep jatqanymyzdy da bilmeıtinbiz, sebebi ol kezde adamdar bir-birine senetin. Sondaı keshterdiń birinde jezdeń meni bıge shaqyrdy. Men ony jaqtyrmaǵan edim, al ol júgermek meniń ıissýyma ǵashyq bolypty. Erteńinde meni taýyp aldy da, aǵalyq qamqorlyq tanyta bastady. Sodan beri birgemiz. Sol kezdegi ıissýymdy áli qoldanamyn.
Iá, erekshe, qaıtalanbaıtyn oqıǵa. Mahabbat atty uly sezim ıissýdan bastaldy. Já, kelesi estelikke kóshelik. Kezektisi sý surasam sút bergen, aıran bergen jeńgemniń áńgimesi.
-Aǵammen alǵash qalaı tanystyńyz, qalaı turmysqa shyqtyńyz?
-Men birinshi turmysqa shyqtym, sosyn baryp tanystym. (O-o-o, mynaýyńyz qyzyq eken dep oıladym ishimnen) Aǵań meni alyp qashty. Joq, aǵań emes, meni aǵańnyń ápkeleri alyp qashty. Aǵańmen tanys bolsaq jaqsy ǵoı, meni bilmeıdi de, túrimdi de kórmegen. Jaı ǵana men jaıly ápkelerinen estigen, sóıtip áıeldik etýge kelise ketken. Men aǵańdy tanymasam da, onyń týǵan ápkesin (ıaǵnı, meniń anamdy) jaqsy tanyǵan edim. Ol kisi jaıly jaqsy pikirler estidim, aýyldyń bári maqtap júretin, qaıyn ápkem úshin ǵana qalýǵa sheshim qabyldadym.
-Al kúıeýińizdi alǵash kórgende qandaı sezimde boldyńyz?
-Meni alyp qasharda qaıyn ápkemniń úıine qonaqqa baramyz dep shaqyrǵan. Qurbylarym da alyp qashý operasıasynyń belsendi qatysýshylary. Sóıtip, men de kelisip, jaqsy kóretin, ózimen kezdeskim kelip júrgen ápkemniń úıine qonaqqa barmaqshy boldym. Tipti, eshqandaı kúdigim de bolmaǵan. Úıge kelip, kólikten tússem, aldymnan birneshe apa oramaldaryn ustap shyǵa keldi. Báriniń kózi mende, sol kezde biraq túsindim. Qarsylastym, boı bermedim, qurbylarymnyń ózi aralasyp turǵandyqtan túk shyqpaıtynyn bildim de, kóndim. Kóngenimdi qaıteıin, kimge turmysqa shyqpaqshy bolǵanymdy da bilmeımin ǵoı, qansha jerden kóz jasymdy kóldetip tursam da, kúıeý jigitimdi izdeı bastadym. Sonda júrgen ár erkekke bir qarap shyǵam, osy shyǵar dep. Biraq berde bireýi túr bermeıdi. «Sonda men kimge turmysqa shyǵamyn?» dep turǵanymda, apalarymnyń «Dáýren qaıda, Dáýren?» degen aıqaıyn estidim. Men ǵana emes, ony úıdegilerdiń bári izdep júr eken ǵoı. (Kúldi) «Kelin qalýǵa kelisti, myna bala qaıda, uıat boldy qudalardan» degen apalarym aǵańdy jan-jaqtan izdep júr. Sóıtip qaıdan tapty deısiń ǵoı? Kúıeýim menen uıalǵanynan baqshadaǵy aǵashtyń ústine shyǵyp alyp, túspeı otyrǵan. Ony apalarym ursyp, tas laqtyryp, áreń túsirip aldy. Túsken soń da aǵańnyń maǵan qaraıtyn beti joq. Tipti alǵashqy túnimiz de qyzyq ótti. (Uıalyp...) Bir-birimizden uıalǵannan, eki jaqqa qarap jattyq, men jylyp jatyrmyn, ol uıalyp jatyr. Sóıtip, bir-birimizben sóılespeı, uıalyp 1 aıdaı júrdik. Ne kerek, qazir 4 bala ósirip otyrǵan baqytty ata-anamyz. Maǵan seniń aǵańsyz kún joq, ómir joq», - dep jeńgem bir kúldirip aldy.
Qashan bolmasyn, máz-meıram, shat-shadyman bolyp eske túsiretin ǵajap oqıǵa. Sebebi bul ǵashyqtardyń mahabbaty «uıat» degen uly uǵymnan bastalǵan. Uıat bar jerde, tárbıe bar,tunyq, taza sezim bar. Men eshqashan umytpaıtyn estelikke aınaldy.
Dál osyndaı áńgimelerdiń kóbin estidim. Alaıda meniń ata-anamnyń mahabbatynan asqan sezim joq, shyǵar. Senseńizder de, senbeseńizder de, ol ekeýiniń mahabbaty bir-birin alǵash kórgen sátten bastalǵan. Sodan beri 25 jyl ótti. 4 balasyn tárbıelep, jetildirip, qýanyshty kúnderiniń kýási bolyp otyrǵan meniń ata-anam – mahabbatqa eń berik adamdar. Men úlgi tutatyn asyl jandar!
Gúlim JAQAN
