Bloger Sadyq Sherimbek óziniń Facebook paraqshasynda Prezıdentke usynylǵan latyn qarpine baılanysty pikirin jazdy, dep habarladıy Qamshy.kz aqparat agenttigi.
"Qazaq tiliniń latyn álippesine kóshýin barynsha qalaıtynnyń biri menmin. Ótkende mınıstrliktiń, til komıtetiniń qyzmetkerlerine resmı relız shyqqansha eshteńe jazbaımyn dep aıtyp edim. Al, búgin shyqqan eken, demek osyǵan 5 tıynymdy qosyp, inilik sózimdi aıtsam eshkim renjimes, endi.
Osydan bir aıǵa jýyq ýaqyt buryn Astana qalasynda Til komıtetiniń jabyq otyrysy ótti. Barǵan kezde, onyń jabyq formatqa ótetinin aıtqan mınıstrliktiń mamandary tipti, Habar arnasyn túsirtkizbeı qaıtaryp jibergenderin aıtty. Biraq, men ózimniń blogger emes, IT salasynyń mamany ekendigimdi aıtyp, jabyq otyrysqa kirýge múmkindik aldym. Álbette, áleýmettik jelige resmı relız shyqqansha eshteńe jazbaýǵa sóz berdim. Konferens zalǵa kirip, bir buryshqa jaıǵastym. Jabyq otyrysqa kelip otyrǵandardyń 90 paıyzy jastary +60 aqsaqaldar edi. Elimizdegi til bilimine úles qosqan kóptegen ǵalym atalardyń jınalǵan otyrysynda, ózim ǵana eshkimge kedergi keltirmeı otyrdym. Bir kezde otyrys ta bastaldy. Arasynda jóni túzý áńgime aıtqandar bolmady emes. Biraq, birazy tyńdalmady da. Júıeli aıtylmady da. Bir kezde otyrǵan aqsaqaldar bir-birin maqtap jónelmesi bar ma?!
- Bul Pálenshe aǵamyz Keńes Úkimeti kezinen beri qazaqtyń mańdaıyna bitken birden bir fonetık ǵalym ǵoı. Ol kisi bul máselede qatelesýi tipten múmkin emes! - dep qoıyp qaldy.
- Bul álippemizdi jas urpaq kemi 300 jyl qoldanatyn bolady! - dedi optımızmge toly ekinshi aqsaqal.
Oshm, ol jerdegi áńgimelerdiń prımerno legi osyndaı boldy. Bir sátte ol jerdegi jınalyp, latyn nusqany qoldaǵaly otyrǵan kisilerdiń kóbisi jalpyhalyqtyq aýradan múldem habarlary joqtaı kórindi. Birnárse anyq edi. Ol jerdegi bizdiń bolashaq latyn nusqamyzdy tańdaýǵa kelgen kisilerdiń jartysynan kóbisi áli kúnge deıin tipti kompúter qoldanbaıtyn, álige deıin qolmen jazatyn kisiler ekenin túsindim. Ol kisilerdiń ary ketken 10-20 jyldary qalǵan bolar. Endeshe, ózderi qabyldaǵaly otyrǵan latyndy bolashaqta qoldanatyndaryna da kúmándandym, oshm.
Sonymen, otyrystyń 15 mınýtynda tórde otyrǵan tóraǵa qaıta-qaıta qyzdarǵa kózimen nuqyp, meni kezdesýden shyǵaryp tastaýdy buıyryp otyrdy. Úsh ret qasyma kelgen qyz ártúrli syltaý aıtyp meni shyǵaryp jiberýge tyrysty. Úshinshisinde, ózim álgi jerge aıtylyp jatqan absýrdtardy tyńdaýǵa qulaǵym zorlanǵan kúıi kezdesýden shyǵyp kettim. Kerisinshe, bul máseleni bolashaqta belsendi qoldanatyn ǵylymdaǵy jastarmen aqyldasa otyryp jasaýdyń ornyna álige deıin baıaǵy "homosovetıkýs" tanymymen oılanyp, sheshim qabyldap jatqan el aǵalaryna ókpem qara qazandaı boldy, shyny kerek.
Ýa, Aǵalar! Taǵy da qaıtalap aıtamyn! Jastar sizderdiń nusqalaryńyzdy qoldanbaıdy! Óıtkeni, ony ózderińiz de qoldanbaısyzdar! Tehnologıanyń ıisi muryndaryńyzǵa barmaı turyp, latynnyń eldiń tehnologıasynyń damýyna úlesi týraly sóz aıtý sizder taraptan baryp turǵan qyp-qyzyl absýrd dúnıe! Prezıdentke búgingi nusqany tanystyrýdyń ózi uıat dep bilemin! Senbeseńizder, osy nusqalaryńyzben qazaqsha eki sóılem jazyp kórińizdershi! Klavıatýra aýystyra berip, qol aýyryp ketedi. Sizder ony bilmeısizder. Óıtkeni, telefonda jazatyndaryńyzǵa kúmánim bar. Aqylǵa kelip, jastardyń aqyldaryn da tyńdap, sanasýǵa shaqyramyn! Onsyz da jaǵdaılaryńyz saEbız hám aEbısh bolyp jatyr. Qazaq úshin jasaǵan eńbekterińiz az emes. Endeshe sonsha eńbektiń núktesin ádemi qoıyp, abyroımen zeınetke ketkilerińiz kelse, dál osy latyn máselesin jastardyń, jas ǵalymdardyń ózine qaldyryńyzdar! Óıtkeni, bolashaq qazaq latyn álippesiniń ıesi biz, jastar! Ózimizge ne keregin jaqsy bilemiz! "Keńesip pishilgen ton kelte bolmas" deıdi. Jabyq otyrysta keńesip jatqandaryńyz durys-aq. Biraq, bul tilde tek sizder sóılep hám jazyp jatqan joqsyzdar. Sondyqtan, aǵa býyn óz-ózderimen keńese bermeı, osyny qoldanar barsha belsendi býynmen teń keńeskeni quba-qup bolar edi".
