Qazaqstan Prezıdenti Investısıalar jáne damý mınıstri Jeńis Qasymbekti qabyldady, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Kezdesýde Nursultan Nazarbaev Investısıalar jáne damý mınıstrligine bekitilgen memlekettik jáne salalyq baǵdarlamalardy iske asyrýdyń mańyzdylyǵyna nazar aýdaryp, olardyń oryndalýynyń aralyq qorytyndylary jóninde aıtty.

– Indýstrıalandyrý baǵdarlamasy júzege asyrylǵan jyldarda 5,2 trıllıon teńgeni quraıtyn 1060 joba iske qosyldy. Sonyń arqasynda 100 myńnan astam jumys orny ashyldy. Osy baǵdarlama iske asyrylǵannan beri júzege asqan jobalar 8 trıllıon teńgeniń ónimin berdi. Bul – elimiz úshin asa mańyzdy jetistik. Biz buǵan deıin óndirilmegen ónimniń 500 túrin shyǵaramyz, – dedi Elbasy.

Memleket basshysy «Nurly jol» ınfraqurylymdyq damý baǵdarlamasyn júzege asyrýdyń nátıjelerine nazar aýdardy.

– 2010 jyldan beri respýblıkalyq mańyzy bar 5 myń shaqyrym joldyń qurylysy men qaıta jóndeý jumystary júrgizildi. 2020 jylǵa deıin taǵy 4500 shaqyrym jol iske qosylady. Qazir respýblıkalyq avtomobıl joldarynyń 85 paıyzy jaqsy kúıde. Batys Eýropa – Batys Qytaı jobasy jáne Astana – Temirtaý, Almaty – Qapshaǵaı, Beıneý – Shetpe, Kókshetaý – Petropavl baǵyttary boıynsha joldar paıdalanýǵa berildi. Sondaı-aq, Ertis ózeni arqyly ótetin Ortalyq Azıadaǵy eń iri kópir salyndy. Osy jobalardy iske asyrýǵa 75 myń adam tartyldy. Bul rette, barlyq qurylys materıaldarynyń 90 paıyzy Qazaqstanda jasalǵan, – dedi Nursultan Nazarbaev.

Sonymen birge, Qazaqstan Prezıdenti «Quryq» teńiz porty men «Qorǵas» shekara mańy yntymaqtastyǵy halyqaralyq ortalyǵynyń ekonomıkalyq mańyzdylyǵyn atap ótti.

Budan bólek, Elbasy «Nurly jer» baǵdarlamasynyń iske asyrylý nátıjelerine toqtalyp, onyń aıasynda 10 mıllıon sharshy metrden astam turǵyn úı salynǵanyn aıtty.

– 9 oblysta turǵyn úı qurylysy júrgizilip jatyr. Barlyq baǵdarlamalar halyqtyń turmysyn jaqsartýǵa arnalǵan. Jınaqtaǵanymyzdyń bárin qazaqstandyqtardyń ál-aýqatyn arttyrýǵa baǵyttadyq, – dedi Memleket basshysy.

Sondaı-aq, Qazaqstan Prezıdenti mınıstrliktiń basshylyǵy tarapynan erekshe mán berýdi qajet etetin jekelegen máselelerge toqtaldy.

– Indýstrıalandyrý jónindegi memlekettik baǵdarlama áli de ekonomıkamyzdyń ártaraptyǵyn qamtamasyz ete almaı otyr. Óńdeý ónerkásibiniń ishki jalpy ónimdegi úlesi aıtarlyqtaı ózgergen joq. Jalpy, qoıylǵan mindetterdi oryndaýǵa qajetti barlyq jaǵdaı bar. Siz ekonomıkalyq jáne áleýmettik basymdyqtardy iske asyrýǵa tolyq jaýaptysyz, – dedi Nursultan Nazarbaev.

Memleket basshysy elimizdi odan ári damytyp, Qazaqstan halqynyń ál-aýqatyn arttyrýǵa baǵyttalǵan barlyq baǵdarlamalardy iske asyrýdyń mańyzdylyǵyn atap ótti.

Sońynda Elbasy birqatar naqty tapsyrma berdi.