Tashkentte uldary men kúıeýlerin zańsyz túrde aıyptady degen narazylyqpen 6 áıel óz-ózderin órtemek.
Ózin-ózi órteý aksıasy 20 qazanda saǵat 12:00-de Eýropalyq odaqtyń Ózbekstandaǵy delegasıasy ornalasqan halyqaralyq bıznes-ortalyǵynyń ǵımaratynda ótpek.
Aksıaǵa qatysýǵa 6 áıel nıet bildirdi: Inobat Arzıeva, Shahnoza Arzıeva, Dılshada Tangatarova, Barno Vosıeva, Matlúba Rýzıeva jáne Mohıra Mannolova.
Ózbekstan quqyqqorǵaý alánsynyń habarlaýynsha, áıeldediń kúıeýleri men uldary 2015-2016 jyldary qamalǵan, 2016 jáne 2017 jyldary Ulttyq qaýpisizdik qyzmeti men Navoı İİB ótkizgen tergeý barysynda olar 6 jyldan 7 jylǵa deıin sottalǵan.
Olarǵa elde tyıym salynǵan ekstremıstik uıymǵa qatysy bar degen aıyp taǵyldy. Atap aıtqanda, Sırıadaǵy DAISH uıymynyń qataryna soǵysqa jiberetin adamdardy jınady dep aıyptaldy.
Sottalǵan 16 jastaǵy Hasan Arzıevtiń anasy Inobat Arzıeva tergeý barysynda ulynyń azaptalǵanyn, bel omyrtqasynyń synǵanyn, búginde baldaqpen ǵana júre alatynyn aıtty.
Arzıev sáýirde Tashkent áýejaıynda Sankt-Peterbýrgtan qaıtyp kele jatqan ýaqytynda ustaldy. Sol kúnnen beri ana balasyn kórmegen.
Arzıevanyń aıtýynsha, polıseı qyzmetkerleri aıyptylardy moıyndatý maqsatynda jigitterdi soqqyǵa jyqqan.
Sheshindirgen, elektroshok paıdalanǵan, qoqan-loqy kórsetip, týǵan týystarymen qorqytqan. Sot ústinde aıyptalǵan jigitter azaptalǵan denelerin kórsetýge daıyn barǵan kórinedi.
2 qazan kúni sot sheshim qabyldap, jigitterdi 6 jyldan 7 jylǵa deıin bas bostandyǵynan aıyrdy.
Al áıelder sottan ádildikti kútedi. Kóktem bastalǵaly birneshe áıel prezıdent Shavkat Mırzıeevke aryz jazyp, Ózbekstan bas prokýrory Ihtıer Abdýllaevtyń aldyna barmaqshy bolǵan. Alaıda bul áreketteri nátıjesiz aıaqtaldy.
«Óz-ózimizdi órteý aksıasynan basqa qolymyzdan keler shara joq», - dedi amaly taýsylǵan ana.
Analary men áıelderi ózderin qurban etýge daıar er adamdardyń esimi tómendegideı:
- Iahshımýrod Vosıev
- Hasan Arzıev
- Farrýh Arzıev
- Adıl Shokırov
- Sanat Salımov
- Djamshıd Saıfýllaev
- Azamat Gaıbýllaev
