Nú-Iork Ýnıversıtetiniń janyndaǵy Langone medısınalyq ortalyǵynyń dárigeri Sem Parnıa júregi toqtap qalǵan adamdar birneshe mınýt boıy aınalasyndaǵy áreketterdi túsinip jatady degen tujyrym jasady, - dep jazady tengrinews.kz.

Maman men onyń komandasy Eýropa men AQSH-tyń klınıkalyq ólimi tirkelgen turǵyndarynan saýalnama alǵan. Olardyń kópshiligi júregi toqtap qalǵannan keıin aınalasynda ne bolǵanyn bilip jatqanyn aıtqan. 

"Olar dárigerler men medbıkelerdiń qalaı jumys istegenin, aınalasynda ne kórip, ne estigenin aıtyp berdi. Olar bilmeýi tıis dúnıeler jaıly aıtty", - deıdi maman.  

Naýqastar aıtqan mundaı derekterdi reanımasıa jasaǵan dárigerler rastap otyr. Keıbir naýqastar júregi toqtap qalǵannan keıin es bilip qana jatpaı, dárigerlerdiń onyń ólimi týraly áńgimeleskenin estigenin aıtqan. "Muny qazirgi ǵylym turǵysynda túsindirý óte qıyn" deıdi ǵalym.