Qyrǵyz úkimeti Qazaqstannyń 100 mln dollar kómegi týraly kelisimdi buzý týraly zań jobasyn parlamentke joldady dep habarlaıdy Qamshy.kz aqparat agenttigi Azattyqqa silteme jasap. Bul týraly vıse-premer-mınıstr Dýıshenbek Zılalıev habarlady. Onyń sózine qaraǵanda, qyrǵyzdar endi kómekke zárý emes.
"Biz bul kómekten bas tartamyz dep sheshtik. Basqa sózben aıtqanda, endi biz kómekke zárý emespiz. Biz qarjy kózin búdjetten nemese qazynadan tys jerlerden izdestiremiz. Qazirgi tańda Eýrazıalyq ekonomıkalyq qaýymdastyǵynyń talaptaryna saı 14 zerthana qurylysy aıaqtalyp qaldy. Ony ózimiz qarjylandyramyz. Jyl aıaǵyna deıin olardyń kóbisiniń qurylysy aıaqtalady", - dedi ol.
Habarlarlarǵa qaraǵanda, Qazaqstanmen kelisimdi buzý týraly zań jobasyn parlamentke ekonomıka mınıstri Artem Novıkov tanystyrady. Qujat kezekten tys qaralady.
Qazaqstannyń Qyrǵyzstanǵa 100 mln dollar bólýi týraly kelisim ótken jyldyń aıaǵynda Sankt-Peterbýrgte Eýrazıalyq Ekonomıkalyq Joǵarǵy keńestiń otyrysynda qabylǵanǵan.
Qarajattyń alǵashqy bóligi - 41 mln dollar keden, kólik ınfraqurylymy, aqparattyq áriptestik, órt qaýipsizdigi, densaýlyq saqtaý, sanıtarlyq epıdemıologıalyq baqylaý, fıtotazalyq jáne veterınarlyq sharalarǵa arnalǵan.
Qazaqstannyń syrtqy ister mınıstrligi qyrǵyzdardyń kómekten bas tartatyny týraly resmı málimet túspegenin habarlaǵan.
