Egerde sán úlgisin kórsetip jatqan is-sharaǵa qatysyp nemese osy ispettes baǵdarlamany kóre qalsańyz, qabaǵyna qar jaýǵan sánbıkelerdi kóresiz. Siz sol kezde olardyń nelikten kúlimsiremeıtindigi jóninde oılanyp kórdińiz be?
Almatyda 19-21 qazan aralyǵynda ótken Mercedes-Benz Fashion Week 2017-2018, VIII halyqaralyq sán aptalyǵy ótken bolatyn. Bul sharaǵa belsene qatysqan sán fotografy Ian Reı sánbıkelerdiń nelikten kúlimsiremeıtindigi jónindegi suraqqa jaýap berdi.
Onyń aıtýynsha, «jurttyń nazary sánbıkeniń keremet kúlkisi men ádemi tisterine emes, sán úlgisine, ústindegi kıimge túsýi kerek. Onyń ústine sán kórsetetin jer qashanda kásibı oryn, sondyqtan sánbıkelerdiń kúlimsiremeýi zańdy nárse».
«Sánbıkeler nege kúlimsiremeıdi?» degen suraqqa budan da ózge de qyzyqty jaýaptar bar. Olardyń biri, «sánbıkelerdiń qaryndary ash». Árıne bul ázilmen aıtylatyn jaýaptardyń biri nemese olar kúızeliske ushyraǵan dep jatady.
Alaıda, 1990 jyldary podıýmdaǵy sánbıkelerdiń emosıalary basty nazar aýdarýshy ádis bolsa, qazirde bul úrdis kerisinshe bolyp keledi. Ian Reı myrza atap ótkendeı, sánbıkelerge aýdarylatyn nazar búgindi tipti tómen bolýy kerek.
«Sánbıkelerdiń betteri tabıǵı etip árlenip, tipti opa-dalap jaqpaı-aq sahnaǵa shyǵarylýy sońǵy kezde etek alyp kele jatqan qubylys. Jurt arýlardyń sulýlyǵyna suqtanbaı, ústindegi shúberekke nazar aýdarýy basty talap».
Naqty mysal keltire ketsek, 2005 jyly Djon Galáno degen tanymal dızaıner óz toptamasyn ertegi keıipkerleri arqyly jurttyń nazaryna usynǵan bolatyn. Árıne, alyp adamdar, egizder jáne ózge de keıipkerler qatysqan sán saýyǵy halyqqa qatty unaǵan. Sol kezde sánbıkeler jınalǵan qaýymǵa qarap kúlimsirep, basqa da qylyqtar kórsetken. Alaıda, sán synshylary muny quptamaı, jurt kóńiliniń kórsetilip otyrǵan toptamaǵa emes, sánbıkelerge aýyp ketkendigin aıtqan bolatyn.
Parıj sán Sındıkatynyń prezıdenti Dıde Grúmbah: «Eger sánbıke kúlimsiremese, ádette, ol jurttyń qyzyǵýshylyǵyn týdyrmaıdy. Sondyqtan kórermen tek kıimge ǵana kóńil boledi. Al egerde sánbıkeler kúlimsireıtin bolsa, onda adamdar onyń kúlkisine, túr-álpetine qarap otyryp, kıim úlgisi jóninde umytyp ketýi yqtımal» deıdi.
