Búgingi zamannyń kórinisi qandaı? Siz bilesiz be? Bul saýalǵa «Iá» dep jaýap qatatyn bolarsyz. Kórgenimiz qıyndyq, tarshylyq, aqsha joq, jaǵdaı joq, aılyq az, janarmaı tapshy taǵysyn-taǵy máseleńizdi jalǵastyra berersiz... Biraq, eshteńeni de kórmegenińizdi bilseńiz ǵoı. Qoǵamnyń qandaı ádiletsiz ekenin, zańnyń qarapaıym adamdarǵa júrmeıtinin, bul ómirde bárin qaltaly dókeılerdiń ǵana ustap turǵanyn siz biletin be edińiz? Teledıdar arqyly, jańalyqtar arqyly bilip, estip júrmiz dep oılaıtyn shyǵarsyz, biraq kórgenimiz ben bilgenimiz oqıǵanyń ber jaǵy ǵana. Tereńinen úńilýdi oılamaǵan ekenbiz, oılamaǵan ekenmin...
Men Qaırat Nurtastyń ónerin moıyndaıtyndardyń qataryna jatamyn. Nebári 18-inde úlken sahnany baǵyndyryp, kórermenniń júregin jaýlaı bilgen talantty jan dep tanımyn ol ánshini. Án aıtyp júrgen edi, birde kınosy da shyǵady degen habardy esittik. «Ókinish» dep atalady, ári ómirinen alynǵan degendi bilgen soń talantyna erekshe tánti men de qalyspaı jetip bardym. Nesi kerek, «Ókinishin» kóremin dep ókinip qalǵanymdy jasyrmaımyn. «Án aıtyp júre berý kerek edi ǵoı, nesi bar edi kıno túsirip» dep oıladym kóńilim qalyp. Arada birneshe jyl ótti, súıikti ánshimniń beriler túri joq. Taǵy bir kınosyn jaryqqa shyǵarmaq eken. Joq, buǵan barmaspyn, ekinshi márte kóńilim qalsa, Qaırat Nurtasty múldem tyńdamaı ketetin shyǵarmyn degen oıda boldym. Sóıtip júrgenimde, fılmge degen oń pikirlerdi estidim, tipti Qaırat Nurtastyń ónerin moıyndamaı júrgender bul joly ánshige erekshe rızashylyǵyn tanytyp jatty. Onyń ústine, kópten beri kózden jasyryp júrgen áıelin jaryqqa shyǵardy emes pe?! Ne de bolsa, baraıyn, kóreıin dedim... Kórdim, ómirdiń shyndyǵy, qoǵamnyń kelbeti, biz bilmeı, estimeı júrgen ómirdiń qara betteri – bári-bári 1 jarym saǵatta kóz aldymnan óte shyqty.
Kóz aldyma qansha adamnyń janyn qıyp, tirilerdiń obalyna qalǵan, sonda da bostandyqta taırańdap júrgen baıbatshalar elestedi. Kóz aldyma zorlanyp, qorlanyp, ómiriniń tas-talqany shyqqan, alaıda isterge amaly joq qazaqtyń qaragóz qyzdary elestedi. Al solardyń ómirin oırańdaǵan azǵyn áli kúnge deıin áreketin jalǵastyryp keletinin oılasam, janym sharasynan shyǵa jazdaıdy. Nege áli óz áreketterin jalǵastyryp keledi? Sebebi, qaltasynyń qalyńdyǵyna, ákesiniń bedeline, famılıasyna senip qalǵandar. Ár adamnyń quqyǵyn qorǵaýy tıis zań da sol bir famılıaǵa baǵynady. Sol bir famılıa birneshe adamnyń aýzyn bekitip, kózin jaýyp, qulaqtaryn kereń etip qoıady. Kópke topyraq shashýdan aýlaqpyn, alaıda bul da bir shyndyqtyń kórinisi ekenin moıyndamasqa bolmas.
Al qarapaıym adamnyń quqyǵyn kim qorǵamaq? Bir qyzdyń zorlanǵany – qoǵamnyń masqarasy, eldiń masqarasy, soǵan kóz juma qarap otyrǵan árbir adamnyń masqarasy. Kinásiz bola tura álsiz adamnyń jazyqsyzdan jazyqsyz sottalýy, aıypty dep tanylýy, abaqtyda jatqany – bılikke syn. Dál osyndaı jaǵdaılar biz ómir súrip jatqan qoǵamda, biz jer basyp júrgen memlekette oryn alyp jatqanyna nalydym. Mine, biz bilsek te, kóz juma qarap otyrǵan shyndyq osy. Qolymyzdan keler shara joq, kónbeske amal joq dep únsiz otyrǵan bizdiń qoǵam osyndaı.
Al Qaırat Nurtastyń komandasy sol shyndyqty kórsetti, kórsete bildi. Muny zalda otyrǵan kórermenniń kóz jasynan, alańdap otyrǵan kóńilinen, bitken ýaqyttaǵy uzaq shapalaǵynan baıqaýǵa bolady. Ádiletsizdik jaılaǵan zamanda ádildikti ornatý, ornaýyn talap etý bizdiń, qarapaıym halyqtyń qolynda. Atalmysh fılm muny esimizge saldy oılana bilgen adamǵa.
Gúlim JAQAN
