Qazaqtyń belgili aqyny, Qazaqstan Jazýshylar Odaǵynyń múshesi, Halyqaralyq «Alash» ádebı syılyǵynyń laýreaty, «Astana-Báıterek-2006» ádebı baıqaýynyń júldegeri Járken Bódeshulynyń óleńderin nazarlaryńyzǵa usynamyz. 

***

Gúldengen Almurt pa eken,

Órik pe eken? 
Qaısysy bolsadaǵy kórikti eken.
Baıyrǵy bala kúngi qımasymdaı, 
Túbine kúnine bir kelip, ketem,
Syrlasqan aq terekpen qaıyń ba eken,
Táńirim sulýlyqtan aıyrma, sen.
Solardyń qasyna kep aıyǵamyn, 
Sarǵaıyp sanammenen ýaıym jesem.
Aralas tobylǵy men búrgen be eken,
Kóńilim kónshimeıdi bir kórmesem.
Aralas tobylǵy men búrgendeı bop,
Ómirim dúr-dúr etip gúlder me eken.
Aǵashtyń ádemisi baqtarda eken, 
Aýnarsyń japyraǵyn - maqpal desem.
Tel ósken qos shynardaı sol baqtaǵy, 
Uldarym úmitimdi aqtar ma eken.
Terbelgen shyrsha ma eken, shynar ma eken, 
Kózime kórinedi bular da ásem.
Myń jyldyq shyrshalar men shynardaı bop,
Óleńim uzaq jylǵa shydar ma eken?
Kóringen dolana men yrǵaı ma eken,
Yrǵaı bolsa yrǵalyp turmaı ma eken.
Aqyndar tabıǵatqa ǵashyq bolsa,
Osylaı termeletip jyrlaıdy eken.
Jyńǵyl da, 
Dolana da kórikti eken.
Solarǵa elikteıin, eliktesem.
Aǵashqa nege sonsha qunyǵamyn,
Ákemiz aǵash kórmeı ólippe eken...

Júregime

Bir jaqsy óleń surady zaman menen, 
Ómirge - kúsh, beretin adamǵa - dem.
Sol óleńdi júregim, qımadyń ǵoı, 
Ókpem qara qazandaı saǵan degen.
Qupıasy beı maǵulym talaı janǵa, 
Aıtylmaǵan sóz qapty Abaıdan da.
Aıtylmaǵan sol sózdi aıtqyzbadyń,
Qulqyń qatyp, kóńiliń qaraıǵan ba?
Eshkimge de jan edim jalynbaǵan,
Qaq jarylsań júregim, jaryl maǵan.
Boıaý qapty Pıkasso qalamynan,
Áli kúnge kenepke jaǵylmaǵan.
Sol boıaýdy qaıtemin taptyrmadyń, 
Sezem onda baıandy baq turǵanyn, 
Eleńdemeı el kezip keter edim, 
Átteń shirkin, saı emes at, turmanym.
Jyr kıigin jetem dep qýaladym,
Terdim qyrda shashylǵan qumalaǵyn.
Jigerim - qum, boldy ǵoı namysym - tul, 
Nege ónermen basymdy dýaladyń. 
Nege, nege senimdi jaýlap aldyń,
Saǵan senip júregim, taýǵa bardym.
Bas júldeni alam - dep alamanda,
Sharshy topta bitispes daýǵa qaldym.
Qaıdaǵy bir aıaz oı mıym qaryp,
Jyn qýalap júrgenshe tıyn qaǵyp.
Búıterimdi bilgende áýel basta-aq, 
Sary dalaǵa keter em sıyr baǵyp. 
Barmasymdy bilesiń qur aıǵaıǵa, 
Saýap qaıda júregim, qudaı qaıda.
Tiri adamǵa qımaıtyn qoldaǵysyn, 
Týystyǵyń bar ma edi Shyǵaıbaıǵa.
Zikir salyp basatyn aptyǵymdy, 
Tym qurysa bolmadym baqsy qurly.
Kúte-kúte tórt boldy eki kózim,
Endi qashan qıasyń jaqsy jyrdy.
Endi qashan, qıasyń endi qashan, 
Kúz sarǵaıtyp barady jerdi jasań.
Qansha sarań bolsańda eı, júregim.
Bermesińdi berersiń, men jylasam.
Boz jorǵadaı taıpalǵan bir bappenen, 
Oılarymdy úmitpen yrǵap kórem.
Qashan meniń jazylar pesheneme, 
Bir jaqsy óleń, shirkin-aı, bir jaqsy óleń.