Qazaqstan ishki ister mınıstrligi Ýkraınada ustalǵan qazaqstandyq bloger Janar Ahmetke (Ahmetova) halyqaralyq izdeý jarıalanǵanyn rastady dep habarlaıdy Qamshy.kz aqparat agenttigi azattyq.org-qa silteme jasaı otyryp.

Memlekettik tıil jáne aqparat departamentiniń dırektory Almas Sadýbaev Janar Ahmettiń buǵan deıin Qazaqstanda "alaıaqtyq" aıybymen sottalǵanyn aıtqan bolatyn.

J.Ahmetova 2005 jyldyń naýryzynan 2008 jyldyń qazanyna deıin azamattardy aldap, paıyzdyq ústememen qaıtaratynyn aıtyp, 50 mıllıon teńgeden astam qarjysyn ıemdengeni anyqtalǵan

2010 jyly tamyzda sot Janar Ahmettiń jazasyn óteýdi onyń uly on tórt jasqa tolatyn 2021 jyldyń 5 qarashasyna deıin keıinge qaldyrǵan.

Bıyl kóktemde Ýkraınaǵa qashyp barǵan Janar Ahmet 21 qazanda Kıev túbinde ustalǵan. Janar Ahmettiń advokaty Vladıslav Grıshenko Qazaqstan oǵan Qylmystyq kodekstiń 177-baby ("Alaıaqtyq") boıynsha Interpolmen izdeý jarıalap, sol boıynsha ustalǵanyn, biraq izdeý jarıalanǵany týraly qujatty áli kórsetpegenin aıtqan.

Janar Ahmetti Qazaqstanǵa ekstradısıalaý máselesi sheshilgenge deıingi bultartpaý sharasyn belgileıtin sot otyrysy 24 qazanda jalǵasady.

Vladıslav Grıshenko Janar Ahmet Ýkraınaǵa barǵan soń birden ózine saıası baspana berý týraly ótinish bildirgenin, onyń áli qaraýda jatqanyn aıtady.

Janar Ahmet opozısıalyq "Trıbýna. Saıası qalam" gazetinde maqala jazyp turǵan jáne áleýmettik jeliler arqyly qazaqstandyq bıliktiń atyna synı pikirlerdi jarıalap, taratatyn belsendi retinde tanylǵan.